Ալիևը հայտարարել է, որ Ուկրաինայի հարվածների պատճառով Ռուսաստանն այլևս ի վիճակի չէ նավթ մատակարարել իր հաճախորդներին
Ադրբեջանի նախագահ Իլհամ Ալիևը Գերմանիա կատարած այցի ընթացքում հայտարարել է, որ ուկրաինական հարվածների հետևանքով նավթավերամշակման գործարանների վնասման պատճառով Ռուսաստանն այլևս ի վիճակի չէ նախկին ծավալներով նավթ և գազ մատակարարել նույնիսկ իր ավանդական գործընկերներին։ «Ռուսական նավթավերամշակման գործարանների շարքից դուրս գալու պատճառով Ռուսաստանը չի կարողանում ավանդական հաճախորդներին մատակարարել այնքան նավթամթերք, որքան կցանկանար», — Բեռլինում ասել է Ալիևը։
Նա նշել է, որ Ադրբեջանը պատրաստ է եվրոպական էներգետիկ շուկայում փոխարինել Ռուսաստանին և էապես ավելացնել մատակարարումները, եթե եվրոպական բանկերը վերսկսեն նավթագազային և ենթակառուցվածքային նախագծերի ֆինանսավորումը։ «Ադրբեջանը կարող է նավթ մատակարարել պահանջվող ծավալներով։ Դա հնարավոր է ինչպես ներքին աղբյուրների, այնպես էլ մեր SOCAR էներգետիկ ընկերության թրեյդինգային ստորաբաժանման միջոցով։ Այսինքն՝ այստեղ որևէ խնդիր չկա», — Ադրբեջանի նախագահի խոսքերն է մեջբերում Minval-ը։
