Բայրամովը ՎՈւԱՄ-ի իր գործընկերների հետ հանդիպման ժամանակ պահանջել է «ճնշում գործադրել Հայաստանի վրա»
Ադրբեջանի արտգործնախարար Ջեյհուն Բայրամովը ՎՈւԱՄ-ի իր գործընկերների հետ հանդիպման ժամանակ պահանջել է ՛՛ճնշում գործադրել Հայաստանի վրա՛՛, հայտնում են ադրբեջանական ԶԼՄ-ները:
Նա նշել է, որ ՛՛միջազգային հանրությունը պետք է ճնշում գործադրի Հայաստանի վրա, որպեսզի վերջինս հրաժարվի իր ռեւանշիստական մոտեցումներից եւ փոխարենը օգտվի կայուն խաղաղության եւ զարգացման հնարավորությունից՛՛:
Բայրամովը, մասնավորապես, ասել է. ՛՛Եռակողմ հայտարարությունների լիարժեք կատարմանը, պատերազմի բոլոր հետեւանքների վերացմանը եւ տարածաշրջանի բոլոր երկրների եւ ժողովուրդների բարեկեցիկ ապագայի կերտմանն այլընտրանք չկա՛՛:
Ինչպես շեշտել է Ադրբեջանի ԱԳ նախարարը՝ միջազգային իրավունքի կիրառումը խաղաղության, անվտանգության եւ զարգացման պայման է. ՛՛Ցավոք, ՎՈւԱՄ-ի անդամ երկրների տարածքներում երկարատեւ հակամարտությունները շարունակում են սպառնալիք հանդիսանալ խաղաղության եւ անվտանգության համար, եւ այդ հակամարտությունները պետք է լուծվեն ինքնիշխանության, տարածքային ամբողջականության եւ երկրների միջազգայնորեն ճանաչված սահմանների անձեռնմխելիության սկզբունքների հիման վրա՛՛: