Հայաստանում մեկ օրում ապաքինվել է COVID-19-ով վարակված 746 քաղաքացի
<p>Հայաստանում հունիսի 18-ին, ժամը 11:00-ի դրությամբ հաստատվել է կորոնավիրուսային հիվանդության ընդհանուր 18 698 դեպք, որոնցից 7560-ն` առողջացած: </p> <p><a href="http://www.armenpress.am/">«Արմենպրես»</a>-ի հաղորդմամբ՝ այս մասին նշված է ՀՀ ԱՆ հիվանդությունների վերահսկման և կանխարգելման ազգային կենտրոնի կայքում: </p> <p>Կորոնավիրուսային հիվանդությամբ այս պահին փաստացի բուժում է ստանում 10 728 պացիենտ: Ընդհանուր առմամբ, կատարվել է 89 992 թեստավորում: Այսպիսով` կա կորոնավիրուսային հիվանդությամբ հաստատված 665 նոր դեպք և 746 առողջացած։</p> <p>Ընդհանուր առմամբ, կորոնավիրուսային հիվանդությունից արձանագրվել է մահվան 309 (ավելացել է ևս 7-ով) դեպք: </p> <p>ՀՀ առողջապահության նախարարությունից հայտնում են, որ մահացած պացիենտները եղել են 62, 70, 85 տարեկան տղամարդիկ և 65, 79, 64, 76 տարեկան կանայք։ Բոլորն ունեցել են ուղեկցող քրոնիկական հիվանդություններ։</p> <p>Արձանագրվել է մահվան ևս 2 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով։ Այդպիսի դեպքերի ընդհանուր թիվը 101 է։ </p> <p><i>Կառավարությունը հունիսի 12-ին որոշում է կայացրել ՀՀ-ում 2020 թվականի մարտի 16-ին հայտարարված և մինչև հունիսի 13-ը երկարաձգված արտակարգ դրության ժամկետը հունիսի 13-ից՝ ժամը 17:00-ից երկարաձգել ևս 30 օրով՝ մինչև հուլիսի 13-ը՝ ժամը 17:00-ն ներառյալ:</i></p> <p> </p> <p>Աղբյուրը` Armenpress, Լիլիթ Դեմուրյան</p>