Իրանն ու Չինաստանը հետաքրքրված են Հայաստանում պղնձաձուլարանի կառուցմամբ. փոխնախարար
Իրանական ընկերությունն ու Չինաստանը հետաքրքրված են Հայաստանում պղնձաձուլարանի կառուցմամբ։ Հետաքրքրությունը մեծանում է, ի հայտ կգան նոր խաղացողներ։ Այս մասին այսօր «Հայաստանի հանքարդյունաբերություն 2025» ֆորումի ժամանակ լրագրողների հետ զրույցում ասաց ՀՀ տարածքային կառավարման եւ ենթակառուցվածքների փոխնախարար Ասատուր Վարդանյանը։
Նախարարի տեղակալը, մասնավորապես, ասաց. «Մենք ունենք պղնձաձուլարան կառուցելու ռազմավարություն։ Այս ուղղությամբ քայլեր են ձեռնարկվում, բայց գործարանը դեռեւս չի կառուցվում։ Անհրաժեշտ են լուրջ տնտեսական հաշվարկներ մեր առկա ռեսուրսները գնահատելու համար։ Ես կարծում եմ, որ մենք պղնձաձուլարան կունենանք նաեւ մեր ռեսուրսների ավելացման արդյունքում, որպեսզի կարողանանք բավարարել պահանջարկը»:
Սակայն, նրա խոսքով, գործարանի կառուցման ճանապարհին կան որոշ խոչընդոտներ։
«Մեկն օտարերկրյա ներդրողների համար տեղեկատվության պակասն է, քանի որ նրանք Հայաստանի ֆոնդային շուկա մուտք չունեն։ Մենք ներկայում այս խնդիրը լուծում ենք թվայնացման միջոցով:
Բացի այդ՝ միջազգային ներդրողների համար անհասկանալի հանքային հաշվետվությունների հնացած համակարգը նույնպես իր ազդեցությունն է ունենում։ Ահա թե ինչու մենք նախաձեռնեցինք ընկերության անդամակցությունը Ստանդարտների միջազգային կոմիտեին: Ես կարծում եմ, որ հաջորդ տարի այս ոլորտում դրական արդյունքների կհասնենք: Կարծում եմ՝ ազգային ստանդարտը պատրաստ կլինի հաջորդ տարվա վերջին»,-ասաց փոխնախարարը։
Խոսելով շինարարական ավազի արտադրության և վաճառքի վերահսկողության մասին՝ Վարդանյանը հայտնեց, որ օրենքի վերջնական ընդունումից հետո կառավարությունը կմշակի բեռնատարները GPS համակարգերով հագեցնելու ընթացակարգեր։
