Միշելն ընդգծել է ՀՀ-ի և Ադրբեջանի բնակչությանը երկարաժամկետ կայուն խաղաղության պատրաստելու անհրաժեշտությունը
Եվրոպական խորհրդի նախագահ Շառլ Միշելը Բրյուսելում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ եռակողմ հանդիպման ավարտին հանդես է եկել հայտարարությամբ։
Միշելը նշել է Ադրբեջանի կողմից հայ գերիների ազատ արձակման կարևորությունը՝ խոստանալով, որ ԵՄ-ն կշարունակի զբաղվել այդ հարցով։
Նա նաև առանձնացրել է սահմանազատման ու տրանսպորտային կապերի ապաշրջափակման վերաբերյալ քննարկումներում գրանցված առաջընթացները:
՛՛Այսօր համաձայնության եկանք ակտիվացնելու առարկայական աշխատանքը Հայաստանի և Ադրբեջանի միջև միջպետական հարաբերությունները կարգավորող խաղաղության պայմանագրի առաջմղման ուղղությամբ և հանձնարարեցինք արտգործնախարարներին հանդիպել մեկ ամսվա ընթացքում՝ աշխատելու տեքստերի նախագծերի ուղղությամբ։
Մանրամասն քննարկեցինք հումանիտար հարցերը, ներառյալ՝ ականազերծումը, գերիների և անհայտ կորածների ճակատագիրը՛՛,-ասված է հայտարարության մեջ:
Բացի այդ՝ Միշելը նշել է. ՛՛Այս բոլոր քննարկումներով ես կցանկանայի ընդգծել, որ կարևոր է երկու կողմերի բնակչությանը տանել և պատրաստել երկարաժամկետ կայուն խաղաղության։ Հանրային հաղորդագրություններն այս առումով չափազանց կարևոր են. նման զգայուն իրավիճակում հանրության մեջ ասված յուրաքանչյուր բառ ակնհայտորեն լսվում է մյուս կողմից և քննարկվում՛՛:
ԵՄ նախագահը վերահաստատել է ԵՄ պատրաստակամությունը՝ հետագայում ևս աջակցելու երկարաժամկետ կայուն խաղաղության հաստատմանը:
Ավելի վաղ հայտնել էինք, որ այսօր կայացել է ՀՀ վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի եռակողմ հանդիպումը:
