«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ

<p>Գլխուղեղի կաթվածը սրտանոթային համակարգի ամենավտանգավոր հիվանդություններից մեկն է, որը կարող է ախտորոշվել ինչպես տարեցների, այնպես էլ երիտասարդների մոտ։ Այս հիվանդությունը տարեկան հազարավոր մարդկանց կյանք է խլում, ուստի սրտանոթային համակարգի առողջությունը պահպանելը շատ կարևոր է։ Մասնագետները նախազգուշացնում են, որ գլխուղեղի կաթվածից խուսափելու համար հարկավոր է վարել առողջ կենսակերպ, պարբերաբար բուժզննում անցնել և չանտեսել անգամ անկարևոր թվացող կասկածելի փոփոխությունները։&nbsp;</p> <p>Հարկ է հիշել, որ առողջական ցանկացած խնդրի դեպքում օրգանիզմը միշտ նախազգուշացնում է դրա մասին որոշակի ախտանշանների միջոցով, և գլխուղեղի կաթվածը նույնպես բացառություն չէ, ուստի ձեր ուշադրությանն ենք ներկայացնում այս խանգարման մասին վկայող ախտանշաններ, որոնք ոչ մի դեպքում չի կարելի անուշադրության մատնել։</p> <p><strong>Տեսողության վատթարացում</strong></p> <p>Գլխուղեղի կաթվածի դեպքում հաճախ պատկերն աղոտանում է, սակայն հնարավոր է նաև տեսողության մասնակի կորուստ։ Եթե նման խանգարումը կտրուկ է ի հայտ գալիս, ապա հարկավոր է անհապաղ դիմել բժշկին։</p> <p><strong>Անհասկանալի խոսք</strong></p> <p>Գլխուղեղի կաթվածի մասին հուշող մյուս ախտանշանը անհասկանալի խոսքն է։ Տուժածը կարող է ամեն ինչ շատ լավ հասկանալ, սակայն չկարողանալ արտահայտել իր մտքերը։ Նման դեպքերում մարդը չի կարողանում նախադասություններ արտասանել և հստակ արտաբերել բառերը։</p> <p><strong>Վերջույթների թուլություն</strong></p> <p>Գլխուղեղի կաթվածի դեպքում հաճախ առաջացող լուծանքը կամ սաստիկ թուլությունը կարող են իրենց ազդեցությունն ունենալ նաև մարմնի վրա։ Նման դեպքերում եթե ախտահարվում է գլխուղեղի աջ կողմը, ապա ախտանշանները նկատվում են մարմնի ձախ կողմում, և հակառակը։ Սա է պատճառը, որ կաթվածի դեպքում հարկավոր է խնդրել տուժածին բարձացնել և առջևում պահել ձեռքերը։ Եթե խնդիրն իսկապես պայմանավորված է կաթվածով, ապա հնարավոր է, որ նա չկարողանա բարձրացնել մի ձեռքը, իսկ բարձրացնելու դեպքում էլ այն կարող է ինքնաբերաբար իջնել։</p> <p><strong>Գլխապտույտ, սրտխառնոց, հավասարակշտության կորուստ</strong></p> <p>Այս ախտանշանները հաճախ են անտեսվում, քանի որ սովորաբար չեն ասոցացվում գլխուղեղի կաթվածի հետ, մինչդեռ իրականում դրանք այս խանգարմանը բնորոշ հիմնական ախտանշաններից են։</p> <p><strong>Ցավ</strong></p> <p>Նյարդաբանների պնդմամբ՝ ոչ մի դեպքում չի կարելի անտեսել կտրուկ ուժգին ցավը։ Գլխուղեղի կաթվածի դեպքում հիվանդները սովորաբար գանգատվում են գլխացավից, սակայն այս հիվանդությունը կարող է դրսևորվել նաև կրծքավանդակի, ուսի, ձեռքի կամ դեմքի մի հատվածի ցավով։</p> <p><strong>Սրտխփոց</strong></p> <p>Գլխուղեղի կաթվածի մասին կարող է հուշել նաև սրտի զարկերի կտրուկ արագացումը, որն ուղեկցվում է հևոցով։</p> <p><strong>Զկռտոց</strong></p> <p>Գլխուղեղի՝ շնչառության օրգանների գործառույթները կառավարող հատվածի ախտահարման դեպքում գլխուղեղի կաթվածի մասին կարող է հուշել երկար ժամանակ չմեղմվող զկռտոցը, ուստի նման անկարևոր թվացող ախտանշանը ևս ոչ մի դեպքում չի կարելի անտեսել։</p> <p><strong>Դեմքի լուծանք</strong></p> <p>Դիմախաղի կամ ժպիտի փոփոխությունը ևս կարող է լինել գլխուղեղի կաթվածի ախտանշան։ Եթե դեմքի մի կողմը կորցնում է ակտիվությունն ու շարժունությունը, ապա հարկավոր է անհապաղ դիմել բժշկին։</p> <p>Նյութը՝ medikforum.ru</p> <p>&nbsp;</p> <p>&nbsp;&nbsp;</p> <p>&nbsp;</p> <h2>&nbsp;</h2>