«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ

Արտաքին կողմնորոշման հարցով հանրաքվեի պահանջին զուգահեռ Ռուսաստանը նաև ակտիվացրել է ՀԱՊԿ-ի հարցով Հայաստանի նկատմամբ ճնշումը՝ բարձրաստիճան տարբեր պաշտոնյաների շուրթերով պարբերաբար հիշեցնելով Երևանին, որ հնարավոր է պատժամիջոցներ կիրառվեն:

Փոխարտգործնախարար Գալուզինի զգուշացումներից հետո նախօրեին էլ ՀԱՊԿ-ի գլխավոր քարտուղար Թալաթբեկ Մասադիկովն է հայտարարել, թե չնայած Հայաստանը համարվում է դաշնակից՝ այդ կառույցին Երևանի հետագա մասնակցության վերաբերյալ որոշումը պետք է կայացվի ողջամիտ ժամկետում:

ՀԱՊԿ-ում, մասնավորապես, ակնարկում են, որ Հայաստանի հարցը կարող է քննարկման դրվել առաջնորդների մակարդակով կառույցի առաջիկա նիստին, որը նոյեմբերին Մոսկվայում է տեղի ունենալու:

«Թե ինչ մեկնաբանություններ կամ ակնարկներ են հնչում, դրանք չեմ մեկնաբանելու: Մենք սառեցրել ենք մեր անդամակցությունը ՀԱՊԿ-ին՝ պայմանավորված այն հանգամանքով, որ ՀԱՊԿ-ը չի կատարել իր պարտավորությունները Հայաստանի Հանրապետության նկատմամբ ունեցած... Հայաստանի Հանրապետության սուվերեն տարածքների վրա հարձակում է տեղի ունեցել ու ՀԱՊԿ-ը գործնականում չի ճանաչել Հայաստանի Հանրապետության այն սահմանները, որոնցով Հայաստանի Հանրապետությունն անդամակցել է ՀԱՊԿ-ին: Այս թնջուկը դեռևս, ցավոք սրտի, լուծված չէ: Թե ինչ կլինի հետո, նիստերի ընթացքում ինչ որոշումներ կկայացվեն, ապա մենք որպես պետություն կարձագանքենք ըստ այդմ», - ասաց ՔՊ-ական պատգամավոր Արթուր Հովհաննիսյանը: