Փոխվարչապետն ընդունել է Նիդեռլանդների Թագավորության դեսպանին
Փոխվարչապետ Մհեր Գրիգորյանն ընդունել է Հայաստանում Նիդեռլանդների Թագավորության առաջին ռեզիդենտ դեսպան Նիկոլաս Սխերմերսին:
Ողջունելով դեսպանին՝ փոխվարչապետը բարձր է գնահատել Հայաստանում Նիդեռլանդների ռեզիդենտ դեսպանության բացումը և հույս հայտնել, որ Հայաստանում դեսպանի ներկայությունը թույլ կտա առավել ակտիվացնել երկու երկրների միջև շփումներն ու հարաբերությունները:
Նիդեռլանդների դեսպանը, շնորհակալություն հայտնելով ընդունելության համար, հավաստիացրել է փոխվարչապետին, որ կներդնի առավելագույն ջանքերը հայ-նիդեռլանդական հարաբերությունները զարգացնելու ուղղությամբ:
Հանդիպման ընթացքում փոխվարչապետը ներկայացրել է Ադրբեջանի կողմից սանձազերծված պատերազմի հետևանքով երկրում ստեղծված իրավիճակը՝ ընդգծելով հումանիտար և սոցիալ-տնտեսական խնդիրները, որոնց մեղմման ուղղությամբ Կառավարությունը ձեռնարկել է մի շարք միջոցառումներ:
Քննարկվել են Հայաստանի և Նիդեռլանդների միջև տնտեսական ոլորտում համագործակցության համար առկա նախադրյալները: Փոխվարչապետը կարևորել է և հեռանկարային է համարել, մասնավորապես, գյուղատնտեսության ոլորտում հնարավոր համագործակցության զարգացումը՝ ներկայացնելով դեսպանին Հայաստանի՝ որպես ԵԱՏՄ անդամ երկրի ներդրումային ներուժը:
Անդրադարձ է կատարվել ՀՀ-ԵՄ Համապարփակ և ընդլայնված գործընկերության համաձայնագրի կարևորությանը: Այս համատեքստում փոխվարչապետը ներկայացրել է ՀԸԳՀ հիմքի վրա մշակված տարբեր ոլորտների ռազմավարությունների ընթացքը: Երկուստեք կարևորվել են արդարադատության ոլորտում իրականացվող բարեփոխումները և այդ ուղղությամբ համագործակցության խորացումը:
