Արցախի ԱԺ նախագահ Արթուր Թովմասյանը դատապարտել է Ադրբեջանի հերթական հայատյաց քաղաքականությունը
Օրերս Բաքվում բացված «Ռազմավարի ցուցահանդես–պուրակ»-ը Ադրբեջանի իշխանության հերթական հայատյաց ու ցեղասպան քաղաքականության ցայտուն դրսևորումն էր: Հայ զինվորներին և ռազմագերիներին պատկերող անմարդկային, նվաստացուցիչ տեսարանների ականատեսը եղանք: Այս մասին հայտարարություն է տարածել Արցախի ԱԺ նախագահ Արթուր Թովմասյանը:
Հայտրարությունում նաեւ ասվում է. «Ադրբեջանական վերնախավի նմանօրինակ վերաբերմունքը ոչ միայն անտեսում և ոտնահարում է միջազգային մարդասիրական իրավունքի նորմերը, այլև վկայում է 1994թ. մայիսի 12-ից սկսած Ադրբեջանի՝ ազգամիջյան թշնամանքով շաղախված ռազմաքաղաքական ղեկավարության գործունեության շարունակությունը:
2020թ. աշնանային պատերազմի ավարտից հետո Ադրբեջանի նախագահ Իլհամ Ալիևը իր հայտարարություններից մեկում նշել է, որ ինքն այնպիսի հայատյաց սերունդ է աճեցրել, որն էլ վճռել է պատերազմի ելքը:
Այդպես Ադրբեջանն ակնհայտորեն ցույց է տալիս իր հակահումանիստական և հակաբարոյական կեցվածքը, դրանով իսկ բացահայտելով ադրբեջանական բանտերում հայ գերիների ու պատանդների նկատմամբ իր վայրագությունները:
Հիմնովին դատապարտում ենք Ադրբեջանի ռազմաքաղաքական ղեկավարության հայակործան գործունեությունը և կոչ ենք անում միջազգային մարդասիրական հանրությանն ու շահագրգիռ կառույցներին պատշաճ գնահատական տալ ազգային արժանապատվության ոտնահարման և նվաստացման իրողություններին:
