Երբ մնաց մեկ թեկնածու, դադարեցի նիստին մասնակցել, տպավորություն է, թե այս ամենն ուղղորդված է, ՍԴ նախագահի քվեարկությանն էլ չեմ մասնակցելու. Հրայր Թովմասյան
Երբ մնացել է մեկ թեկնածու, ես դադարել եմ նիստին մասնակցել, տպավորությունն է՝ այս ամենն ուղղորդված է, քվեարկությանը չեմ մասնակցելու։ Այս մասին ՍԴ նիստից հետո լրագրողների հետ զրույցում ասաց ՍԴ դատավոր Հրայր Թովմասյանը:
Նա նախ պարզաբանեց, թե ինչու է առաջադրել Աշոտ Խաչատրյանի թեկնածությունը որպես ՍԴ նախագահի: «Ես առավոտյան ասացի, որ երեք հիմնական գործոն եմ հաշվի առնելու թեկնածուներ առաջադրելուց։ Առաջինը մարդկային հատկանիշներն են․ ես ոչ միայն առաջադրել եմ պարոն Խաչատրյանին, այլ յուրաքանչյուրին անդրադարձել եմ և ասել՝ ինչու նրանց չեմ առաջադրում, հիմնավորել եմ իմ չառաջադրելը՝ այդ երեք գործոններից ելնելով: Պարոն Խաչատրյանը ամենափորձառուն է, գիտության դոկտոր է, որպես հեղինակություն ինձ համար ամենամեծն է և ունի որոշակի կառավարչական հմտություններ»,- ասաց նա:
Բացի այդ Հրայր Թովմասյանը նշեց, որ մի գործոն ևս կա. «Եթե որևէ բան չի փոխվում, պարոն Խաչատրյանի պաշտոնավարմանը մնացել է երկու տարի, և սա կլիներ յուրօրինակ անցումային ժամանակահատված, որ դրանից հետո մնացածն իրար շատ ավելի լավ ճանաչեին և ընտրություն կատարելուց չապավինեին նախկին փորձին, ունենային իրար հետ շփում և կարողանային ընտրել: Ըստ էության, 4 դատավոր նոր են ՍԴ-ում, որ իրար չեն ճանաչում և այդ մթնոլորտում չեն եղել»:
Հարցին էլ՝ ինչպես է գնահատում Երվանդ Խունդկարյանի թեկնածությունը, նա պատասխանեց. «Երբ մնացել է մեկ թեկնածու, ես դադարել եմ նիստին մասնակցել, ինձ մոտ տպավորություն է՝ այս ամենն ուղղորդված ու պայմանավորված է»:
Ճշտող հարցին՝ պայմանավորվա՞ծ է, որ Խունդկարյանը դառնա ՍԴ նախագահ, նա ասաց. «Ինձ մոտ նման տպավորություն ստեղծվեց»:
Թովմասյանը նաև նշեց, որ քվեարկությանը չի մասնակցելու:
