ՆԱՏՕ-ի երկրները պատրաստվում են պատերազմի՝ կոնկրետ տվյալներ ունենք․ Բելառուսի պաշտպանության նախարար
ՆԱՏՕ-ի երկրները, արևելքից եկող սպառնալիքի քողի տակ, ոչ միայն ռազմականացվում են, այլ պատրաստվում են պատերազմի, երեքշաբթի՝ հոկտեմբերի 4-ին, Մինսկում հանրապետության նախագահի և անվտանգության ուժերի հանդիպման արդյունքներով հայտարարել է Բելառուսի պաշտպանության նախարար Վիկտոր Խրենինը։
«Նրանք պատրաստում են իրենց ենթակառուցվածքները, պատրաստում են իրենց զորքերը։ Մենք կոնկրետ տվյալներ ունենք»,- նրա խոսքերն է մեջբերել BelTA-ն։
«Բոլոր այն սպառնալիքներին, որոնք կարող են առաջանալ, մենք արագ, ճշգրիտ, համարժեք արձագանքելու ենք ստեղծված իրավիճակին։ Մենք ունենք և՛ ուժ, և՛ միջոցներ դա անելու համար»,- ասել է Խրենինը։
Նա ստեղծված իրավիճակն անվանել է «իսկապես ծանր»։
«Ցավոք, հարևան երկրները ուրվագծել են իրենց նպատակները, որոնց ցանկանում են հասնել մեր երկրի դեմ աշխատելով։ Հենց այդպես, մենք չենք կարող դա առանց ուշադրության թողնել»,- ընդգծել է գերատեսչության ղեկավարը։
