«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ


Պարեկային ծառայության հնգամսյա դասընթացի մասնակիցները երդվել են անմնացորդ նվիրվել հայրենիքին և պետությանը

02/03/2021

ՀՀ ոստիկանությունում նոր կազմավորվող պարեկային ծառայության  համար նախատեսված հնգամսյա դասընթացին մասնակցող սովորողներն այսօր երդվեցին անմնացորդ նվիրվել հայրենիքին, պետությանն ու ժողովրդին:

Երդման արարողությանը ներկա էին ՀՀ ոստիկանության պետի տեղակալ, ոստիկանության գնդապետ Արա Ֆիդանյանը, ՀՀ արդարադատության նախարարի տեղակալ Քրիստիննե Գրիգորյանը, ՀՀ արդարադատության նախարարության միջազգային իրավական համագործակցության համակարգող-խորհրդական Ամալյա Հովսեփյանը, «Իրազեկ քաղաքացիների միավորում» հասարակական կազմակերպության ղեկավար Դանիել Իոաննիսյանը, ՀՀ ոստիկանության կրթահամալիրի ղեկավար կազմը՝ կրթահամալիրի պետ, ոստիկանության գեներալ-մայոր Մուշեղ Բաբայանի գլխավորությամբ: 

Միջոցառման մեկնարկին հյուրերը ծաղիկներ խոնարհեցին ծառայության և Արցախյան պատերազմի ընթացքում զոհված ոստիկաններին նվիրված հուշակոթողին:

«Այսօր նշանակալի օր է, քանի որ սկիզբ է դրվում նոր ոստիկանության ստեղծմանը: Ձեր բարեխիղճ ծառայությունը միտված է ոչ միայն հանցավորության դեմ պայքարին, հասարակական կարգի ամրապնդմանը, այլև ծառայելու հասարակությանը և լինելու յուրաքանչյուր քաղաքացու կողքին»,- շնորհավորական իր ուղերձում նշեց ՀՀ ոստիկանության պետի տեղակալ, ոստիկանության գնդապետ Արա Ֆիդանյանը:

ՀՀ արդարադատության նախարարի տեղակալ Քրիստիննե Գրիգորյանը, դիմելով պարեկային ծառայության  սովորողներին, նույնպես շնորհավորեց ու մաղթեց բարի երթ և պատվարժան ծառայություն. «Դուք այսօր երդվեցիք հավատարիմ լինել սահմանադրական կարգին, անվերապահորեն ղեկավարվել օրենքներով, պաշտպանել հայրենիքը: Այս օրը նշանավորվեց որպես մեծ ճանապարհի մի կարևոր հանգրվան»: 

Միջոցառումն ավարտվեց հանդիսավոր քայլերթով:

ՀՀ արդարադատության նախարարություն/Ministry of Justice of Armenia