Առաջին անգամ Կոմիտասի ծննդավայր Քյոթահիայի պաշտոնական տարեգրքում տեղեկություն ներառվեց Կոմիտասի մասին
Առաջին անգամ Կոմիտաս Վարդապետի ծննդավայր Քյոթահիայի (Կուտինա) պաշտոնական տարեգրքում 20 էջանոց ծավալուն նյութ ներառվեց մեծ երգահանի և երաժշտագետի, երաժշտական ազգաբանի և երգչի, բանահավաքի և խմբավարի, հայկական ազգային կոմպոզիտորական դպրոցի հիմնադրի մասին։
2019 թ. Քյոթահիայի հնագիտության և ազգագրության ինստիտուտ-թանգարանի հրատարակած թյուրքալեզու տարեգրքում ներառվել են մանկավարժ Սոֆյա Քալանթարյանի և կոմիտասագետ, թյուրքագետ, թարգմանիչ Տիրան Լոքմագէոզյանի համատեղ «Քյոթահիայում ծնված էթնոերաժշտագետը՝ Կոմիտաս Վարդապետը» հոդվածը՝ համեմված լուսանկարներով և Տիրան Լոքմագէոզյանի «Կոմիտաս Վարդապետի ստեղծագործած և հավաքած թյուրքերեն երգերը» հոդվածը՝ թյուրքերեն թարգմանված Տիրան Լոքմագէոզյանի կողմից։
Հրապարակումը արդյունք էր վանաձորցի 71-ամյա մանկավարժ Սոֆյա Քալանթարյանի 2019 թ. սեպտեմբերի 26-ին՝ Կոմիտաս Վարդապետի ծննդյան 150-ամյակին Քյոթահիա նախաձեռնած՝ զարմանալի հանդիպումներով ու բացահայտումներով, անհավանական զուգադիպություններով լի ճամփորդության։
Պարզվեց, որ Կոմիտասի ծննդավայրում չգիտեն Կոմիտասի մասին նույնիսկ տեղի երաժշտական և գիտական համայնքներում, սակայն կարճ ժամանակում հաջողվեց պաշտոնական պայմանավորվածություն ձեռք բերել Քյոթահիայում կազմակերպելու Կոմիտասի ստեղծագործությունների համատեղ համերգ՝ Երևանի կոնսերվատորիայի երգչախմբի մասնակցությամբ, որը, ցավոք, հետաձգվեց համավարակի պատճառով։
Ավելին, Հնագիտության և ազգագրության ինստիտուտ-թանգարանի տնօրինության հետ հանդիպումը հնարավորություն ստեղծեց մեր օրերում առաջին անգամ Կոմիտաս Վարդապետի անունը հնչեցնելու նրա ծննդավայրում, որի արդյունքը եղավ տարեգրքում հոդվածների հրապարակումը։
Այս նախաձեռնությունն անհնարին կլիներ առանց «Ագօս» թերթի լրագրող Բեսսե Կաբակի, գլխավոր խմբագիր Էդվարդ Տանձիկյանի և սյունակավար Բասքին Օրանի, ինչպես նաև մի շարք սրտացավ թյուրք մտավորականների։
Հավելյալ տեղեկություններ և հեղինակների հետ հարցազրույցի համար կարող եք դիմել՝ Մհեր Մանուկյան, հեռ.՝ 077032525, էլփոստ՝ komitasfacts@gmail.com
