Եվրոպական միությանը Հայաստանի Հանրապետության անդամակցելու գործընթացի մեկնարկի մասին նախագիծը հեռանկար չունի. Ռոստոմյան
ԱԺ «Հայաստան» խմբակցության պատգամավոր Արմեն Ռուստամյանի գնահատմամբ՝ «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» նախագիծը հեռանկար չունի, բայց Հայաստանի համար կարող է լրջագույն պրոբլեմներ առաջացնել։
«Հայաստանն այն շռայլությունը չունի, որ «կամ-կամ»-ի պրոցես իր առաջ դնի, ընտրի՝ այստե՞ղ, թե՞ այնտեղ, մանավանդ այն պարագայում, երբ «կամ-կամ»-ի ընտրության կողմերն այսօր պատերազմական վիճակի մեջ են»,- ԱԺ-ում ասաց նա։
Ռուստամյանի խոսքով՝ Հայաստանն այսօր շարունակում է լինել ԵԱՏՄ անդամ, ՀԱՊԿ լիիրավ անդամ ու սա առնվազն իմպերատիվ կերպով պահանջում է չկատարել քայլեր ու չմտնել այնպիսի գործընթացների մեջ , որոնք Հայաստանին կկանգնեցնեն «կամ-կամ»-ի ընտրության առջև։
Ըստ Ռուստամյանի՝ ակնհայտ է, որ Հայաստանը միաժամանակ չի կարող անդամակցել իրար հետ անհամատեղելի կառույցների հետ։
«Հետևաբար, ԵՄ ինտեգրման գործընթացը պետք է տեղի ունենա այն տրամաբանությամբ, որ Հայաստանը պատրաստ է մոտ լինել ԵՄ-ին այնքանով, որքանով դա չի սպառնում Հայաստանի անվտանգությանն ու լինելիությանը»,- ընդգծեց Ռուստամյանը։
Պատգամավորը հայտարարեց՝ անդամակցելով ԵՄ-ին՝ Հայաստանի անվտանգության երաշխիքը դառնալու է ոչ թե Եվրոպական միությունը, այլ՝ Թուրքիան։
«Դուք Թուրքիայի ու Ռուսաստանի միջև ընտրության առաջ եք դնելու մեր ժողովրդին»,- նշեց նա։
