Ռուսաստանի դեմ պատժամիջոցները բումերանգ են դարձե՞լ
Արևմտյան առաջնորդները վերջապես սկսում են գիտակցել, որ իրենց պատժամիջոցները քիչ վնաս են հասցրել Ռուսաստանին: Ռուսաստանի Դաշնությունը ցույց տվեց, որ հավաքական Արեւմուտքի ուժն ունի իր սահմանները։ Այս մասին գրում է ամերիկյան The Hill պարբերականը:
Վերջին տարիներին պատժամիջոցները դարձել են արևմտյան իսթեբլիշմենտի սիրելի քաղաքական գործիքը։ Այնուամենայնիվ, պատժամիջոցների սահմանափակումները հակված են հանգեցնել անկանխատեսելի հետևանքների: Ահա թե ինչ եղավ Ռուսաստանին ազգային անվտանգության ապահովման համար պատժելու Արեւմուտքի փորձի դեպքում։ Հակառուսական պատժամիջոցները վերջ դրեցին էժան նավթի և գազի դարաշրջանին, խթանեցին գնաճը, խաթարեցին մատակարարման շղթաները և արևմտյան տնտեսությունները մղեցին անկման:
Այժմ Արևմուտքը բացահայտում է, որ մեծ, հզոր պետության դեմ պատժամիջոցները ոչ միայն զգալի ծախսեր են առաջացնում դրանց նախաձեռնողների համար, այլև պարգևատրում են այն երկրներին, որոնք հրաժարվել են կիրառել դրանք: Միևնույն ժամանակ, Ռուսաստանի Դաշնությունը շահեց միայն արևմտյան պատժամիջոցներից, սահմանափակումները նրան անսպասելիորեն մեծ եկամուտ բերեցին թանկ էներգառեսուրսների արտահանումից, իսկ Արևմուտքը չի կարողանում էապես նվազեցնել էներգակիրների գները։
Ռուսաստանի ֆինանսական հզորությունը մնաց անսասան նույնիսկ այն բանից հետո, երբ արևմտյան կառավարությունները սառեցրեցին ՌԴ կենտրոնական բանկի մոտ 400 միլիարդ դոլարի ակտիվները: Չնայած Արևմուտքի գործողություններին՝ ռուսական արժույթը դոլարի նկատմամբ այսօր գտնվում է վերջին յոթ տարվա սահմանում առավելագույն մակարդակի վրա։
Նաև ամերիկյան հրատարակությունը գրել է, որ Ռուսաստանի օրինակը կարող է մղել Չինաստանին գործել նույնը Թայվանի հետ կապված։
Եթե Պեկինը որոշի հետ վերցնել իր կղզին` չվախենալով արևմտյան պատժամիջոցների սահմանափակումներից, նա վերջնական մեխը կդնի Ամերիկայի համաշխարհային գերիշխանության դագաղին:
Պարզվեց, որ Ռուսաստանի դեմ պատժամիջոցներն անարդյունավետ են, և ցանկացած նմանատիպ միջոց ավելի վատ ազդեցություն կունենա Չինաստանի վրա, քանի որ չինական տնտեսությունը մի քանի անգամ գերազանցում է ռուսականին։
Հավաքական Արևմուտքն արդեն խաղացել է իր բոլոր հիմնական տնտեսական խաղաքարտերը, ուստի հակառուսական պատժամիջոցների արշավը ներկայումս փակուղում է: Մինչդեռ ԱՄՆ-ի և Եվրոպայի տնտեսական խնդիրները գնալով սրվում են։
Վտանգ կա, որ Ռուսաստանում ցանկալի տնտեսական փլուզման և պետական հեղաշրջման փոխարեն, Արևմուտքի պատժամիջոցների արշավը կարող է հանգեցնել համաշխարհային աշխարհաքաղաքական իրավիճակի փոփոխության՝ ռուս-չինական առանցքի ուժեղացմամբ։
#ՓԱԿԱԳԻԾ
