Ինչպե՞ս է հնարավոր աշխատանքներն արդյունավետ իրականացնել, երբ ամեն րոպե Ադրբեջանը փոխում է դիրքորոշումը. Փաշինյան
ՀՀ վարչապետ Նիկոլ Փաշինյանն անդրադարձել է Ադրբեջանի դիրքորոշմանը, ըստ որի՝ Թուրքիան պետք է ներգրավվի ԼՂ հակամարտության բանակցային գործընթացին: «Արմենպրես»-ի փոխանցմամբ, «Ինտերֆաքս»-ի հետ զրույցում Փաշինյանը նշել է, որ դա շատ տարօրինակ դիրքորոշում է:
«Քանի որ Մոսկվայում Ռուսաստանի, Հայաստանի և Ադրբեջանի արտգործնախարարների կողմից ընդունվել է հայտարարություն և այնտեղ հստակորեն արձանագրվել է, որ ԵԱՀԿ Մինսկի խմբի համանախագահության ձևաչափը չի փոխվելու: Բանակցությունները պետք է շարունակվեն այդ ձևաչափով: Ես ասում եմ չէ՞, որ ամեն անգամ Ադրբեջանը փոխում է դիրքորոշումը: Մոսկվայում այդ հարցը համաձայնեցվել է համատեղ հայտարարությամբ, բայց երկու օր հետո Ադրբեջանը կրկին հայտարարել է, որ Թուրքիան պետք է լինի ԵԱՀԿ Մինսկի խմբի համանախագահ: Թվում էր, թե հարցը լուծված է, հայտարարություն է եղել, հարցը փակված է, բայց այն կրկին բացվում է: Այս իրավիճակում ինչպե՞ս է հնարավոր այդ աշխատանքներն արդյունավետ իրականացնել, երբ ամեն րոպե Ադրբեջանը փոխում է արդեն համաձայնեցված դիրքորոշումները և հարցերը»,- ասել է վարչապետը:
