Հաջորդ շաբաթ Մոսկվայում կհանդիպեն Ռուսաստանի և Ադրբեջանի ԱԳ նախարարները
Հաջորդ շաբաթ Մոսկվայում տեղի կունենա Ռուսաստանի և Ադրբեջանի արտգործնախարարներ Սերգեյ Լավրովի և Ջեյհուն Բայրամովի առաջին հանդիպումը։
Ռուսաստանի արտգործնախարարության խոսնակ Մարիա Զախարովայի խոսքով՝ Բայրամովը Մոսկվա կժամանի ռուսական կողմի նախաձեռնությամբ։
«Մեր երկրի արտգործնախարար Սերգեյ Լավրովի հրավերով Ադրբեջանի արտգործնախարար Բայրամովը օգոստոսի 26-ին պաշտոնական այցով կժամանի Ռուսաստան։ Տեղի կունենա երկու երկրների արտաքին քաղաքական գերատեսչությունների ղեկավարների հանդիպում, որի ընթացքում նախատեսվում է քննարկել երկկողմ հարաբերությունները, տարածաշրջանի ու միջազգային հարցերի լայն շրջանակ», - ասել է Զախարովան։
Վերջինիս խոսքով՝ Ադրբեջանի արտգործնախարարը հանդիպումներ կունենա նաև Ռուսաստանի կառավարության և Դաշնության խորհրդի անդամների հետ։
Սա Բայրամովի երկրորդ արտասահմանյան այցն է արտգործնախարարի պաշտոնում։ Նշանակումից շաբաթներ անց՝ առաջին պաշտոնական այցով նա մեկնել էր Թուրքիա, որտեղ հանդիպել էր գործընկերոջ, ինչպես նաև նախագահ Ռեջեփ Էրդողանի հետ։
