Մեզ միավորում է ոչ միայն մասնակցությունը հասարակական կյանքին, այլև` պատասխանատվությունը
Նոյեմբերի 8-ին ՀՀ Ազգային ժողովում տեղի է ունեցել հայ երիտասարդ նկարիչների «Նոր ուժ» խորագիրը կրող աշխատանքների ցուցադրությունը:
ԱԺ աշխատակազմի ղեկավար-գլխավոր քարտուղար Վահան Նարիբեկյանը, ողջունելով նկարիչներին օրենսդիր մարմնում, ընդգծել է, որ խորհրդարանը քաղաքացիների ընտրությամբ ձեւավորվող ներկայացուցչական մարմին է: «Ազգային ժողովն ամուր կապերով է կապված արվեստի հետ: Մեզ միավորում է ոչ միայն մասնակցությունը հասարակական կյանքին, այլեւ` պատասխանատվությունը սերունդների առջեւ ու ապագայի հանդեպ»,- հավելել է Վահան Նարիբեկյանը:
«Nika Art» կազմակերպության ղեկավար Նիկոլ Պարազյանը նշել է, որ արվեստն ու քաղաքականությունը սերտորեն համագործակցում են միմյանց հետ: Ըստ նրա՝ արվեստը մշտապես որոշակի քաղաքական գործառույթներ է իրականացնում:
«Նոր ուժ» ցուցահանդեսում ներկայացված են թե՛ սկսնակ, թե՛ արդեն կայացած 18 նկարիչների աշխատանքները, ինչպես նաեւ հայ մեծանուն նկարիչ Մինաս Ավետիսյանի «Եռագույն» ստեղծագործությունը, որն արտահայտում է նկարչի ողջ սերն ու ընկալումը հայրենիքի հանդեպ:
Նիկոլ Պարազյանը տեղեկացրել է, որ իրենք նախատեսել են անցկացնել ցուցադրված աշխատանքների յուրօրինակ քվեարկություն՝ ինքնակպչուն «խնձորների» միջոցով: Առավելագույն «խնձորներ» ստացած աշխատանքը կարժանանա հատուկ մրցանակի:
