Մեզ համար կարևոր է, որ հարթակները, որտեղ քննարկումները տեղի կունենան, լինեն ի շահ կայունության և խաղաղության հաստատման․ ԱԳ փոխնախարար
Հանրային հեռուստաընկերության եթերում ՀՀ ԱԳ նախարարի տեղակալ Վահան Կոստանյանի հարցազրույցից:
- Ինչպես է մեկնաբանվում Ադրբեջանից հնչող կարծիքը՝ թե Հայաստանն է փորձում խուսափել խաղաղության պայմանագրի կնքումից:
- Իմ կարծիքով սա միջազգային գործընկերներին մոլորեցնելու հեթական փորձն է: Վերջին տարիների և ամիսների բանակցային գործընթացը ցույց է տալիս, թե որ կողմն է կառուցողական: Այս առումով մեր միջազգային գործընկերների մոտ հարցեր չպետք է առաջանան:
Այնուամենայնիվ, ըստ Պետրոս Ղազարյանի, նման հարց կա Հայաստանի միջազգային գործընկերների մոտ, մասնավորապես ՌԴ-ից է հնչել որոշակի հայտարարություն:
Ի պատասխան դիտարկմանը, ԱԳ նախարարի տեղակալն ասաց՝ խոսքը բոլոր անաչառ միջազգային գործընկերների մասին է:
«Մեզ համար կարևոր է, որ հարթակները, որտեղ քննարկումները տեղի կունենան, լինեն ի շահ կայունության և խաղաղության հաստատման, և ոչ թե միջնորդները փորձեն սեփական դիվիդենտները քաղել այս գործընթացից»,- ասաց Կոստանյանը:
Այսինքն, եթե կար ժամանակ, որ մտածում էինք, թե Մոսկվան Հայաստանի կողմից է, հիմա նույնիսկ չեզո՞ք չէ՝ հարցին ի պատասխան Կոստանյանն ասաց՝ տրամաբանորեն յուրաքանչյուր պետություն սեփական շահերն է առաջ տանում:
«Մենք էլ մեր հերթին գնահատում ենք, թե այդ շահերը ինչքանով են համադրելի Հայաստանի Հանրապետության շահերի հետ, մասնավորապես ՀՀ ինքնիշխանության, տարածքային ամբողջականության, սահմանների անքակտելիության հետ»,- ասաց Կոստանյանը: