«Ալմա-Աթայի հռչակագիրը ոչ մի կերպ չի ճանաչում Լեռնային Ղարաբաղը որպես Ադրբեջանի մաս». Բաբայան
Արցախի Հանրապետության արտաքին գործերի նախարարի ժամանակավոր պաշտոնակատար Դավիթ Բաբայանն անդրադառնալով ՌԴ ԱԳ նախարար Սերգեյ Լավրովի այն պնդմանը, որ հայկական կողմը խաղաղության պայմանագիրը Ալմա-Աթայի հռչակագրի վրա կառուցելով, ըստ էության հրաժարվում է Արցախից, նշել է, որ այդ փաստաթուղթը արցախյան խնդրի հետ որևիցե առնչություն չունի։
«Միջազգային իրավունքում շատ բան կախված է փաստաթղթերի ճիշտ մեկնաբանությունից։ Վերցնենք, օրինակ, 1991 թվականի Ալմա-Աթայի հռչակագիրը, որն այժմ ակտիվորեն քննարկվում է։ Արդյոք այնտեղ կա՞ միջազգայնորեն ճանաչված սահմանների, նախկին ԽՍՀՄ սահմանների մասին հիշատակում:
Դրանում միայն նշվում է «ճանաչել և հարգել միմյանց տարածքային ամբողջականությունը և գոյություն ունեցող սահմանների անձեռնմխելիությունը»: Այսպիսով, այս հռչակագիրը ոչ մի կերպ չի ճանաչում Լեռնային Ղարաբաղը որպես Ադրբեջանի մաս։ Բայց, դարձյալ, այստեղ առանցքայինը մեկնությունն է, այն էլ՝ համապատասխան»,-գրել է Բաբայանը:
