Բաքվի բռնապետի քարոզչամեքենան սեփական հասարակության շրջանում ոչ միայն մեթոդաբար տարածել է հակահայկականության ախտ. Ոսկանյան
Հայաստանում տարածված է սխալ տեսակետ, թե Ադրբեջան հորջորջվող արհեստածին կազմավորման բաշիբոզուկները որևէ գաղափարական շարժառիթ չունեն մեր դեմ կռվելու, ինչը արմատապես սխալ է և հանգեցնում է թշնամու բարոյահոգեբանական խթանների թերագնահատման՝ դրանից բխող հնարավոր վրիպումներով։
Իրականում տասնամյակներ շարունակ Բաքվի բռնապետի քարոզչամեքենան սեփական հասարակության շրջանում ոչ միայն մեթոդաբար տարածել է հակահայկականության ախտն իր ամբողջության մեջ, այլ նաև չափազանց ագրեսիվ քարոզչության միջոցով կարողացել է արմատավորել Արցախի վերաբերյալ այն կեղծ մտայնությունը, որի խտացումներից մեկը, դիցուք, «Շուշին Ադրբեջանի բռնազավթված մարգարիտն է» առասպելույթ-կարծրատիպն է։
Ակնհայտ է, որ այն որևէ աղերս չունի իրականության հետ, կամ ավելի «լավատեսական» մոտեցման դեպքում, այդ աղերսը սոսկալիորեն թույլ է և խոցելի, սակայն, այսուհանդերձ, առասպելույթն առկա է և բաշիբոզուկների համար ծառայում է գաղափարական խթան։
