«ԶՈՐԱՎԱՐ ՍԵՊՈՒՀ» ՊԱՏՄԱՔԱՂԱՔԱԿԱՆ ՎԵՐԼՈՒԾԱԿԱՆ ԿԵՆՏՐՈՆԻ ՊԱՇՏՈՆԱԿԱՆ ԿԱՅՔ

Ռուսաստանի պաշտպանության նախարարը հայտարարել է, որ Ուկրաինայում հատուկ ռազմական գործողության առաջին փուլի հիմնական խնդիրները կատարված են, ինչը, նրա խոսքով, հնարավորություն է տալիս կենտրոնանալ գլխավոր նպատակի՝ Դոնբասի ազատագրման վրա:
«Ուկրաինայի զինված ուժերին զգալի վնաս է հասցվել: Նվաճել ենք օդային գերակայություն: Գործնականում ոչնչացվել են ռազմաօդային ուժերը և հակաօդային պաշտպանության համակարգը: Երկրի ռազմածովային ուժերը դադարել են գոյություն ունենալ: Զգալի կորուստներ են կրել ցամաքային և օդադեսանտային հարձակման ուժերի բոլոր կազմավորումները»,- ասել է Շոյգուն:
Շոյգուն հայտնել է, որ վերջին երկու շաբաթվա ընթացքում Ուկրաինայում ոչնչացվել է շուրջ 6 հարյուր օտարերկրյա վարձկան: Ռուսաստանի պաշտպանական գերատեսչության ղեկավարն ընդգծել է, որ Մոսկվան համապատասխան կարձագանքի ՆԱՏՕ-ի մի շարք երկրների՝ Ուկրաինա ռազմական ինքնաթիռներ և հակաօդային պաշտպանության համակարգեր մատակարարելու դեպքում:
«Ռուսաստանի զինված ուժերը կշարունակեն հատուկ ռազմական գործողությունը, քանի դեռ չեն հասել իրենց առջև դրված նպատակներին», հայտարարել է Շոյգուն:
Ավելի վաղ Ռուսաստանի պաշտպանության նախարարության ներկայացուցիչը հայտարարել էր, որ բարձր ճշգրտության «Կալիբր» թևավոր հրթիռները ծովից ոչնչացրել են զինամթերքի երկու խոշոր պահեստ, որտեղից մատակարարվում էր Կիևի մերձակայքում գտնվող ուկրաինական զորքերի խումբը: Բացի այդ, գիշերը ռուսական ուժերը ոչնչացրել են Ուկրաինայի 68 ռազմական օբյեկտ, այդ թվում՝ Բուկ Մ1 զենիթահրթիռային երեք համալիր և երեք անօդաչու թռչող սարք: