Լուկաշենկոն բացատրել է իր երդմնակալության մասին նախապես չտեղեկացնելու որոշումը
Բելառուսի նախագահ Ալեքսանդր Լուկաշենկոն հայտարարել է, որ իր երդմնակալությունը Բելառուսի ներքին գործն է, հետևաբար՝ ինքը պարտավոր չէր արարողության մասին նախապես տեղեկացնել արևմտյան երկրներին՝ փոխանցում է Vesti կայքը:
«Բելառուսի օրենքով մենք արևմտյան պետություններին կամ որևէ մեկին պարտավոր չենք զգուշացնել: Դա մեր երկրի ներքին գործն է»,- հայտնել է Ալեքսանդր Լուկաշենկոն:
Բելառուսի նախագահն ընդգծել է նաև, որ հարևաններին Աստված է տալիս, նրանց չեն ընտրում:
«Մենք դատապարտված ենք միասին ապրելու, բարեկամանալու»,- նշել է հանրապետության ղեկավարը:
Լուկաշենկոյի խոսքով՝ հարևան երկրները նեղացել են, որ իրենց չեն հրավիրել երդմնակալության արարողությանը:
Հիշեցնենք, որ նախօրեին Մինսկի Անկախության պալատում տեղի էր ունեցել Բելառուսի նախագահ Ալեքսանդր Լուկաշենկոյի երդմնակալության արարողությունը, որի մասին նախապես չէր հայտարարվել, ու որը չէր հեռարձակվել հեռուստատեսությամբ կամ ռադիոյով:
