Ադրբեջանը սադրիչ գործողությունների միջոցով խոչընդոտում է իրավիճակի լիցքաթափմանը. ԱԳՆ
<p style="text-align: justify;">Հայաստանի արտգործնախարարությունը հայտարարություն է տարածել Ադրբեջանի կողմից հրադադարի ռեժիմի խախտման դեպքի մասին, որի արդյունքում դիպուկահարի կրակոցից <a href="https://www.azatutyun.am/a/30749226.html" target="_blank">մահացու հրազենային վիրավորում</a> է ստացել զինծառայող Աշոտ Գևորգի Միքայելյանը:</p> <p style="text-align: justify;">ԱԳՆ-ն նշել է, թե հատկանշանական է, որ Ադրբեջանը այս սադրանքին դիմում է հաշվված օրեր անց ԵԱՀԿ Մինսկի խմբի համանախագահների կողմից արված <a href="https://www.azatutyun.am/a/30746548.html" target="_blank">հայտարարությունից</a>, որում համանախագահներն առանձնահատուկ կարևորել էին ստեղծված իրավիճակում հրադադարի ռեժիմի խստագույնս պահպանումը և սադրիչ գործողություններից զերծ մնալը:</p> <p style="text-align: justify;">«Միաժամանակ Ադրբեջանը հայտարարում է Թուրքիայի հետ լայնածավալ <a href="https://www.azatutyun.am/a/30749215.html" target="_blank">զորավարժությունների </a>անցկացման մասին: Այս ամենը վկայում է, որ Ադրբեջանի ղեկավարությունը սադրիչ գործողությունների միջոցով խոչընդոտում է իրավիճակի լիցքաթափման և խաղաղ գործընթացի վերսկսման միջազգային միջնորդների ջանքերը և դրանով իսկ ստանձնում է հետագա ապակայունացման հետևանքների պատասխանատվությունը», - ասված է հաղորդագրությունում:</p> <p style="text-align: justify;">ԱԳՆ-ն նշում է, որ ստեղծված իրավիճակի վերաբերյալ Հայաստանի դիրքորոշումը հստակորեն արտահայտվել է վարչապետի կողմից հուլիսի 23-ին <a href="https://www.azatutyun.am/a/30743175.html" target="_blank">կառավարության նիստին</a>: «Ադրբեջանը հրապարակայնորեն պետք է հրաժարվի ուժի կիրառումից, ետ կանգնի իր առավելապաշտական մոտեցումներից և վստահելի քայլեր ձեռնարկի հրադադարի ամրապնդման ուղղությամբ, ինչը հնարավորություն կստեղծի խաղաղ գործընթացի վերականգնման և առաջմղման համար», - նշված է ԱԳՆ հայտարարությունում:</p> <p style="text-align: justify;"> </p> <p style="text-align: right;"><em>Աղբյուր` </em>azatutyun.am</p>