Մերօրյա պատերազմներում ԱԹՍ խոցելը հեշտ գործ չէ, այն էլ ժամանակակից. Փորձագետ
<p style="text-align: justify;">ՀՀ ԶՈՒ ՀՕՊ ստորաբաժանումների իրականացրած այսօրվա օպերացիան մարտավարական և հոգեբանական առումով մեծ նշանակություն ունի։ Նման տեսակետ <a href="https://news.am/">NEWS.am</a>–ի հետ զրույցում հայտնեց «Հենակետ» վերլուծական կետրոն փորձագետ Վիտալի Մանգասարյանը՝ անդրադառնալով ՀՀ զինված ուժերի կողմից Ադրբեջանի ԶՈՒ–ին պատկանող իսրայելական արտադրության «Elbit Hermes 900» անօդաչու թռչող սարքի խոցմանը։</p> <p style="text-align: justify;">«Մերօրյա պատերազմներում ԱԹՍ խոցելը հեշտ գործ չէ, այն էլ ժամանակակից՝ ինչպիսին է «Elbit Hermes 900» -ը։ Այդպիսի ԱԹՍ –ների վրա տարբեր նորագույն համակարգեր են կիրառվում, և շատ ժամանակ խնդիր է առաջանում օբյեկտը, այսպես ասած, ուղեկցման վերցնելու գործում։ «Elbit Hermes 900» -ը շուրջ 30 մլն ԱՄՆ դոլար արժողությամբ մարտավարական անօդաչու է և, կարելի է ասել, պատմության մեջ առաջին անգամ է նման անօդաչու խոցվել, համենայն դեպս, հակառակը ապացուցող հրապարակային տեղեկատվություն չկա»,–ասաց փորձագետը։</p> <p style="text-align: justify;">Մանգասարյանը, անդրադառնալով օպերացիայի մարտավարական նշանակությանը, ընդգծեց, որ սրա միջոցով հայկական զինված ուժերը ցույց տվեցին հակառակորդին, որ հայկական բանակը ունակ է կանխելու ցանկացած, անգամ իր հզորությամբ և կարողություններով աչքի ընկնող խոշոր ԱԹՍ–ի առաջխաղացումը։</p> <p style="text-align: justify;">«Կարծում եմ՝ հակառակորդը կհասկանա, որ անկախ իրենց զինանոցում եղած ժամանակակից տեխնիկական միջոցների առկայությունից, հայկական բանակը ունակ է կանխելու դրանց առաջխաղացումը սահմանի ցանկացած հատվածում, ինչը բանակի կառավարման օղակներին էլ ավելի վստահություն է ներշնչում։ Գաղտնիք չէ, որ հակառակորդը այդօրինակ տեխնիկական միջոցները հիմնականում օգտագործում է հրամանատարական կետեր ֆիքսելու և հարվածներ հասցնելու նպատակով։ Ժամանակակից պատերազմներում շատ դեպքեր են արձանագրվել, որ պատերազմող կողմերը հնարավորության սահմաններում փորձել են շեշտը դնել տարատեսակ ԱԹՍ–ների կիրառման վրա, և եթե Ադրբեջանին դիտարկենք այդ երկրների շարքում, կարող ենք արձանագրել , որ ԱԹՍ–ների պատերազմներում նրանք ֆավորիտ չեն, և հայկական բանակը ունակ է ինչպես կանխել այդ ԱԹՍ–ների առաջխաղացումը, այնպես էլ պատասխան թիրախային հարվածներ հասցնել սահմանի ողջ երկայնքով»,– ասաց նա։</p> <p style="text-align: justify;">Դիտարկմանը, թե հարվածային ԱԹՍ–ները նպատակ ունեն ոչ միայն կոնկրետ թիրախներ խոցել, այլև խուճապ առաջացնել, այդ թվում՝ քաղաքացիական անձանց շրջանում, Մանգասարյանը պատասխանեց.</p> <p style="text-align: justify;">«Զինվորականների, ինչպես նաև սահմանամեձ բնակավայրերում ապրող քաղաքացիների մոտ ԱԹՍ ները, մեղմ ասած, լարվածություն են առաջացնում։ Շատ կարևոր է, որ մարդիկ տեսնեն և համոզվեն , որ մեր Զինված ուժերը ունակ են անգամ նման ժամանակակից տեխնիկական միջոցներ շարքից հանել, ինչը բնականաբար կնպաստի լարվածության թուլացմանը»։</p> <p style="text-align: justify;">Հիշեցնենք, որ հուլիսի 12–ից հայ-ադրբեջանական հակամարտությունը մտավ լարվածության նոր փուլ. ադրբեջանական կողմը հայկական զինված ուժերի սահմանային դիրքը գրավելու անհաջող փորձերից հետո ակտիվացրեց հրետակոծություններն ու հարվածային ԱԹՍ-ների կիրառումը Հայաստանի հյուսիսարևելյան սահմանի ուղղությամբ՝ տալով մեկ տասնյակից ավելի կորուստներ` այդ թվում բարձրաստիճան սպաների (գեներալ-մայոր, գնդապետ և այլն)։ Ռազմական գործողությունների ընթացքում հայկական կողմից զոհվել են չորս զինծառայողներ, որոնցից երկուսը ժամկետայիններ։ Հայ–ադրբեջանական շփման գծում ընթացող մարտական գործողություններին արձագանքել են ՀԱՊԿ-ը, Ռուսաստանը, ԱՄՆ Պետդեպարտամենտը, ՄԱԿ գլխավոր քարտուղարը, այլ միջազգային կառույցներ ու դիվանագետներ։</p> <p style="text-align: justify;"> </p> <p style="text-align: right;"><em>Աղբյուր` News.am</em></p>