Հոսպիտալացման կարիք ունեցող քաղաքացիների թիվը հիմնականում վերջին 1 շաբաթվա ընթացքում տատանվում էր 150-200–ի շրջանակներում
<p>Հայաստանում հունիսի 21-ի երեկոյից չկա կորոնավիրուսով վարակված և հոսպիտալացման կարիք ունեցող քաղաքացի, ով հոսպիտալացման իր հերթին է սպասում տանը: <a href="https://www.armenpress.am/">«Արմենպրես»</a>-ի հաղորդմամբ՝ այս մասին հայտնեց ՀՀ առողջապահության նախարար Արսեն Թորոսյանը՝ պարետատան նիստից հետո առցանց ճեպազրույցում:</p> <p> «Հոսպիտալացման կարիք ունեցող քաղաքացիների թիվը հիմնականում վերջին 1 շաբաթվա ընթացքում տատանվում էր 150-200 –ի շրջանակներում: Նրանց մի մասը գտնվում էր տանը, այսինքն՝ տանն էր սպասում հոսպիտալացման, իսկ մի մասը գտնվում էր այլ բժշկական կենտրոններում: Եվ երեկ երեկոյից փաստացի տանը սպասող քաղաքացի, որպես այդպիսին, չունենք: Այսինքն, այն քաղաքացիները, որոնց մոտ հաստատվում է կորոնավիրուսային հիվանդություն և ովքեր կարիք ունեն հոսպիտալացման՝ իրենց առողջական վիճակով պայմանավորված, հրատապ հոսպիտալացվում են: Եվ այս առումով կարող ենք ասել, որ այդ խնդիրը լուծված է»,-ասաց Թորոսյանը:</p> <p>Հաջորդ խնդիրը մնում է վարակվածներին որոշ բուժհաստատություններից դեպի կորոնավիրուսային հիվանդության բուժմամբ զբաղվող հիվանդանոցներ տեղափոխելը: Նախարարը վստահեցրեց, որ այդ խնդիրը նույնպես մոտ օրերս կլուծվի: Թորոսյանը նկատեց, որ այդ առումով հիմա բավականին բարվոք վիճակ է, պետք է ամեն ինչ արվի այդ վիճակը պահելու համար:</p> <p><em>Հայաստանում հունիսի 22-ի ժամը 11:00-ի դրությամբ հաստատվել է կորոնավիրուսային հիվանդության ընդհանուր 20 588 դեպք, որոնցից 9131-ն` առողջացած: Կորոնավիրուսային հիվանդությամբ փաստացի բուժում է ստանում 10 980</em><em> </em> <em>պացիենտ: Ընդհանուր առմամբ, կատարվել է 96843 թեստավորում: Ընդհանուր առմամբ, կորոնավիրուսային հիվանդությունից արձանագրվել է մահվան 360 դեպք:</em><em> </em></p> <p> </p> <p>Աղբյուրը՝ Armenpress, Աննա Գրիգորյան</p> <p>Կայքի խմբագիր՝ Աննա Հակոբյան, Generalnews.am</p>