Փորձում են կրակին յուղ լցնել. Անդրեյ Կլիմովը` ՀՀ–ում ԵՄ դիտորդների մասին
Արևմուտքն առաջին հերթին ցանկանում է հնարավորինս շատ կրքեր բորբոքել Ռուսաստանի շուրջ։ Այս հայտարարությունն արեց Ռուսաստանի Դաշնության խորհրդի պետական ինքնիշխանության պաշտպանության և ՌԴ ներքին գործերին միջամտության կանխարգելման հանձնաժողովի նախագահ, Դաշնության խորհրդի միջազգային գործերի կոմիտեի փոխնախագահ Անդրեյ Կլիմովը` պատասխանելով Sputnik Արմենիայի թղթակցի՝ Հայաստանում ԵՄ առաքելություն տեղակայելու հարցին։
«Դա իրենց պետությունն է, և իրենք իրավունք ունեն որոշելու, թե որ դիտորդները լինեն իրենց երկրի տարածքում, իսկ որոնք` ոչ։ Սա միջազգային իրավունքի ընդհանուր նորմ է»,– ասաց Կլիմովը։
Սենատորի խոսքով` ղարաբաղյան հակամարտությունը գոյություն ունի արդեն երկար տարիներ, և միամտություն է ենթադրել, որ ներկա պայմաններում կա ինչ–որ կախարդական արագ և վերջնական որոշում, որը կբավարարի բոլոր կողմերին։ Կլիմովը հավելել է, որ դա շատ լուրջ և երկարատև գործընթաց է, որը նրբանկատություն և պրոֆեսիոնալիզմ է պահանջում։
«Ցավոք, այս հարցին խառնվում են այն անձինք, որոնց համար ամենակարևորը ՌԴ սահմանների շուրջ կրքերը թեժացնելն է։ Ինձ թվում է, որ մեր հայ հարևանները պետք է դա հաշվի առնեն։ Հաճախ իրենց չեն փորձում օգնել, այլ կրակին յուղ են են ուզում լցնել»,– ընդգծել է քաղաքական գործիչը։
Նա նաև նշել է, որ Մոսկվան իրեն օրինակելի է պահում, քանի որ փորձում է երկխոսություն վարել` հարգելով պետությունների ինքնիշխանությունը։ Միևնույն ժամանակ, ըստ Կլիմովի, երբ օվկիանոսի հակառակ կողմից սկսում են ազդել (նկատի ունի ԱՄՆ–ին. խմբ.), դա խանգարում է գործին։
«Եզրակացություններ պետք է անեն հենց հայ հարևանները։ Այդ հարցերը վերաբերում են նրանց ինքնիշխան իրավունքներին։ Մենք կարող ենք խորհուրդներ տալ, կարծիքներ փոխանակել, մասնակցել կարգավորման այս կամ այն ձևաչափերին, բայց դա, այնուամենայնիվ, իրենց պետությունն է։ Սա առաջին հերթին այն խնդիրն է, որը նրանք պետք է լուծեն` հաշվի առնելով օբյեկտիվ հանգամանքները, և այն, որ առանց լուրջ փոխզիջումների ոչ ոք չի կարող անել»,– ասել է նա։
Առաջարկվող Նորություններ
