Որոնք են ՀՀ-ում զբոսաշրջության զարգացման ռազմավարական ուղիները
Generalnews.am-ի հյուրն է ՀՊՏՀ <<Ամբերդ>> հետազոտական կենտրոնի ավագ հետազոտող, ՀՊՏՀ և ՀՀ ՊԿԱ դասախոս, տ․գ․թ․, դոցենտ Գայանե Թովմասյանը։
- Ի՞նչպիսին է զբոսաշրջության արդի վիճակը մեր երկրում։
- Ինչպես գիտենք, վերջին տարիներին զբոսաշրջությունը մեր երկրում դրսևորել է աճի միտումներ։ Ինչպես ամբողջ աշխարհում, այնպես էլ ՀՀ-ում, ոլորտի աճը խաթարվեց կորոնավիրուսի համավարակի պատճառով։ Ըստ ՀՀ Վիճակագրական կոմիտեի տվյալների՝ 2019 թ. ՀՀ է ժամանել 1894377 զբոսաշրջիկ (2018 թ. համեմատ աճելով 14.7%-ով)։ 2020 թ․ համավարակի պայմաններում ՀՀ ներգնա զբոսաշրջային այցելությունների թվաքանակը կազմել է 375216՝ նախորդ տարվա համեմատ նվազելով 80%-ով: Ըստ ՍԷԿՏ-ով ստացված տվյալների՝ 2021 թ․ առաջին եռամսյակում ՀՀ է այցելել 86524 ներգնա զբոսաշրջիկ, երկրորդ եռամսյակում՝ 152739, երրորդ եռամսյակում՝ 370512, ըստ նախնական տվյալների՝ չորրորդ եռամսյակում՝ 273623 մարդ։ Այսինքն կարելի է ասել, որ ըստ նախնական տվյալների 2021թ․ ՀՀ է այցելել մոտ 880000 զբոսաշրջիկ, ինչը լավ է՝ հաշվի առնելով նախորդ տարվա անկումը, շարունակվող համավարակը, սահմանափակումները և այլն։
Հարկ է նշել, որ վերջին տարիներին աճում էր նաև ՀՀ ներքին զբոսաշրջիկների թվաքանակը: 2019 թ. ՀՀ ներքին զբոսաշրջիկների թվաքանակը կազմել է 1544600 մարդ՝ նախորդ տարվա համեմատ աճելով 41.4%-ով: 2020 թ․, համավարակով պայմանավորված, նվազել է նաև ներքին զբոսաշրջիկների թվաքանակը՝ նախորդ տարվա համեմատ մոտ 33%-ով՝ կազմելով 1045756 մարդ։ 2021 թ․ առաջին երեք եռամսյակներում ներքին զբոսաշրջիկների թվաքանակը կազմել է 1435111 մարդ՝ 2020 թ․ նույն ժամանակահատվածի համեմատ աճելով 53․4%-ով։ Սա իհարկե լավ ցուցանիշ է, այսինքն շատերը արտագնա զբոսաշրջությունը փոխարինել են ներքին զբոսաշրջությամբ։
- Ի՞նչ պատկեր է ՀՀ-ում զբոսաշրջության կարգավորման օրենսդրաիրավական դաշտում։
- «Զբոսաշրջության և զբոսաշրջային գործունեության մասին» ՀՀ օրենքն ընդունվել է 2003 թ․։ Արդեն մի քանի տարի է, ինչ մշակվել է Զբոսաշրջության մասին նոր օրենքի նախագիծը, որը դեռ չի ընդունվել։ Դրանով նախատեսված են մի շարք փոփոխություններ։
- Ըստ Ձեզ՝ որոնք են ՀՀ զբոսաշրջության ոլորտի՝ արդեն իսկ հիմնական ուղղությունները, իսկ որոնք՝ հեռանկարային։
- Հայաստանում զբոսաշրջության հիմնական տեսակներից են պատմամշակութային-կրոնականը, առողջարանայինը, զարգացման մեծ հեռանկարներ ունեն արկածայինը, գինու և գաստրոնոմիական զբոսաշրջությունը, ագրո- և էկոզբոսաշրջությունը, բժշկականը, փառատոնայինը, կրթականը, և այլն։
- Ի՞նչ խնդիրներ կան ՀՀ-ում զբոսաշրջության մրցունակության ոլորտում, ի՞նչպես հաղթահարել դրանք։
- Ըստ Համաշխարհային տնտեսական ֆորումի կողմից հրապարակած 2019 թ. զբոսաշրջության մրցունակության զեկույցի՝ Հայաստանը 140 երկրների շարքում եղել է 79-րդը։ Հիմնախնդիրներ են համարվել՝ աշխատուժի որակավորումը (77-րդ տեղ), զբոսաշրջիկների ներգրավմանն ուղղված մարքեթինգի և բրենդինգի արդյունավետությունը (82-րդ տեղ), երկրի բրենդի ռազմավարությունը (99-րդ տեղ), տոմսերի հարկերը և օդանավակայանի վճարները (105-րդ տեղ), զբոսաշրջության արդյունաբերության զարգացման կայունությունը (81-րդ տեղ), բնական և մշակութային ռեսուրսների ենթահամաթիվը (103-րդ տեղ), բնական ակտիվների գրավչությունը (83-րդ տեղ) և այլն: Ուստի, քայլերը պետք է ուղղված լինեն մրցունակության համաթվի այն հենասյուների գծով, որոնց ցուցանիշները ցածր են զեկույցում։
- Ի՞նչ հեռանկարներ ունի հայկական զբոսաշրջությունը ԵԱՏՄ անդամակցության պայմաններում։
- ԵԱՏՄ անդամակցությունը Հայաստանի համար հիանալի հնարավորություն է՝ զարգացնելու զբոսաշրջությունը՝ հաշվի առնելով այս երկրների բնակչության մեծ թվաքանակները, առանց վիզային ռեժիմը և ուղիղ թռիչքների առկայությունը բացառությամբ Ղրղզստանի: Հայաստանի և ԵԱՏՄ անդամ երկրների միջև զբոսաշրջության զարգացման նպատակով անհրաժեշտ է այդ երկրների համար մշակել համապատասխան զբոսաշրջային փաթեթներ՝ հաշվի առնելով առկա ռեսուրսները և զբոսաշրջային պահանջարկը, կազմակերպել տարբեր բնագավառների գործարար հանդիպումներ՝ գործնական զբոսաշրջության զարգացման նպատակով և այլն: Սա իհարկե հնարավոր է, բայց շատ երկար աշխատանք է պահանջում։
- Ի՞նչ կասեիք ՀՀ-ում զբոսաշրջության անվտանգության ապահովման մակարդակի մասին, արդո՞ք պետությունն ու համապատասխան մարմինները կարգավորում են խնդիրը։
- Ըստ 2019թ. զբոսաշրջության մրցունակության զեկույցի՝ ամենաապահով ու անվտանգ երկրներն են համարվել Ֆինլանդիան, Իսլանդիան: Հայաստանը զբաղեցրել է 40-րդ տեղը։
Ընդհանուր առմամբ, զբոսաշրջիկների վրա կարող է բացասական ազդեցություն ունենալ Արցախի 44-օրյա պատերազմը, ինչպես նաև ՀՀ սահմանին տիրող իրավիճակը: Ուստի, խիստ անհրաժեշտ է ու կարևոր Հայաստանն արտերկրում ներկայացնել որպես ապահով ու անվտանգ, հարուստ պատմություն ու մշակույթ և զբոսաշրջային գրավչություններ ունեցող երկիր:
- Ըստ Ձեզ՝ ինչպե՞ս անդրադարձավ 2020 թվականը ՀՀ զբոսաշրջության ոլորտում ներդրումների վրա։
- Ինչպես արդեն նշեցի, 2020 թվականն ընդհանուր առմամբ խիստ բացասական ազդեց զբոսաշրջության վրա, մի կողմից համավարակը, մյուս կողմից՝ Արցախյան պատերազմը։ Անշուշտ նման իրավիճակը ներդրումների համար չի կարող բարենպաստ լինել, ուստի մնում է հուսալ, որ ապագա տարիներին ոլորտը կվերականգնվի, և զբոսաշրջային ենթակառուցվածքներում կկատարվեն նոր ներդրումներ։
- Ինչպիսի՞ն է ըստ Ձեզ ՀՀ-ում հյուրանոցային ծառայությունների որակը, արդյո՞ք այն հավակնում է միջազգային որոշակի մակարդակի՝ թե դեռ շատ հեռու ենք դրանից։
- ՀՀ-ում իրականացվում է հյուրանոցային տնտեսության օբյեկտների որակավորում կամավորության սկզբունքով, ու այսօր ընդամենը 8-ն են որակավորված 847-ից։ Բացի այդ չկա դրանց լիցենզավորում, ուստի այս առումով զբոսաշրջիկները կարող են տուժել։ Այժմ որոշ հյուրանոցներ օգտագործում հարցաշարեր` իրենց ծառայությունների որակը և հյուրերի բավարարվածության մակարդակը գնահատելու համար: Կարևորելով հյուրանոցային ծառայությունների որակը՝ իմ կողմից մշակվել է հյուրանոցային ծառայությունների որակի գնահատման հատուկ գործիք՝ ARMQUAL, որի 32 հարցից բաղկացած հարցաթերթի օգնությամբ հյուրանոցներում իրականացրել եմ գնահատում։ Արդյունքները ցույց են տալիս, որ դեռ շատ խնդիրներ կան բարձրորակ ծառայություններ մատուցելու համար։
- Ո՞րոնք են ՀՀ-ում զբոսաշրջության զարգացման ռազմավարական ուղիները։
- Կառանձնացնեի հետևյալ հիմնական քայլերը, որոնք անհրաժեշտ են ոլորտի զարգացման համար.
- իրականացնել ագրեսիվ մարքեթինգային արշավներ՝ ՀՀ-ն արտերկրում որպես անվտանգ ու ապահով, գրավիչ զբոսաշրջային դեստինացիա ներկայացնելու համար՝ փորձելով չեզոքացնել Արցախյան պատերազմի և հարևան երկրների հետ քաղաքական կոնֆլիկտի հնարավոր բացասական ազդեցությունը ներգնա զբոսաշրջային որոշումների վրա,
- մշակել զբոսաշրջային արդյունավետ պրոդուկտներ և նոր շուկաներ ներթափանցել, որոնք ՀՀ-ի համար ավելի հեռանկարային են,
- բարելավել զբոսաշրջային ծառայությունների գին-որակ ցուցանիշները և բարձրացնել հյուրանոցային տնտեսության օբյեկտներում ծառայությունների մակարդակը, ինչը կնպաստի զբոսաշրջիկների գոհունակության աստիճանի մեծացմանը,
- ոլորտի մարդկային կապիտալի բարելավում․ ուսումնական հաստատությունները և մասնավոր հատվածի կազմակերպությունները պետք է համագործակցեն ոլորտի մասնագետների պատրաստման գործում, ուսանողները պետք է հնարավորություն ունենան փորձառություն անցնել զբոսաշրջային կազմակերպություններում` ուսումնառության ընթացքում գործնական հմտություններ ձեռք բերելու համար, կրթական համակարգը պետք է համապատասխանի աշխատաշուկայի պահանջներին,
- բարելավել ոլորտի վիճակագրական հաշվառումը` զբոսաշրջիկների տարիքի, սեռի, ազգային պատկանելության, ճանապարհորդության նպատակների և օրերի քանակի վերաբերյալ ավելի մանրամասն տվյալներ ունենալու համար,
- բարելավել ոլորտի օրենսդրությունը, ինչը թույլ կտա լիցենզավորել ոլորտի կազմակերպությունների գործունեությունը, ինչպիսիք են հյուրանոցային տնտեսության օբյեկտները, զբոսաշրջային գործակալությունները, մշակել զբոսաշրջության առանձին տեսակների զարգացման ռազմավարական ծրագրեր,
- ներդրումներ ներգրավել ոլորտի ենթակառուցվածքների զարգացման համար,
- զարգացնել տրանսպորտային ենթակառուցվածքները, ավելացնել բազմաթիվ ուղղություններով ուղիղ թռիչքների քանակը և նվազեցնել ավիատոմսերի գինը, ներգրավվել բյուջետային ավիաընկերություններ տարբեր ուղղություններով: Ուղիղ և էժան թռիչքները գրավիչ են զբոսաշրջիկների համար և կհանգեցնեն զբոսաշրջային հոսքերի աճի,
- բարձրացնել շրջակա միջավայրի և բնական պաշարների պահպանության մակարդակը, հյուրանոցներում էկոպիտակներ ներդնել, բարձրացնել բնակչության էկոլոգիական կրթության և գիտակցության մակարդակը` զբոսաշրջությունն առավել կայուն դարձնելու նպատակով:
- Կարո՞ղ է արդյոք կայուն զբոսաշրջությունը օգնել մեր երկրին՝ հաղթահարելու զբոսաշրջության ոլորտի ներկա մարտահրավերները։
- Հայաստանում կայուն զբոսաշրջության զարգացումը խիստ կարևոր խնդիր է: Հայաստանը շրջակա միջավայրի կայունության ինդեքսով 140 երկրների շրջանում 101-րդն է:
Զբոսաշրջության կայուն զարգացման համար անհրաժեշտ է իրականացնել հետևյալ քայլերը՝
- զբոսաշրջության կայուն զարգացման ծրագրերի մշակում,
- B&B-երի ավելացում մարզերում՝ տեղական զարգացմանը և զբաղվածությանը նպաստելու համար,
- Էկոհյուրանոցների կառուցում, հյուրանոցների և այլ զբոսաշրջային կազմակերպությունների կողմից էկոպիտակների օգտագործում,
- բնական ռեսուրսների ռացիոնալ օգտագործում, ջրի և աղբի վերամշակման մեխանիզմների ներդրում,
- կայուն տրանսպորտի համակարգի մշակում,
- կանաչ տարածքների ավելացում, անտառահատումների և անտառային հրդեհների կանխարգելում,
- վերականգնվող էներգիայի աղբյուրների օգտագործում, էներգաարդյունավետության և կայուն շինարարության ապահովում,
- կայուն սպառման և կայուն արտադրության մասին բնակչության տեղեկացվածության մակարդակի բարձրացում,
- խելացի քաղաքային գյուղատնտեսության ապահովում՝ օգտագործելով հիդրոպոնիկա, ակվապոնիկա, ուղղահայաց հողագործություն և այլն:
Կայուն զարգացման համար անհրաժեշտ է մարդկանց մտածելակերպի, կենսակերպի, վարքագծի, արմատացած արժեքային համակարգի փոփոխություն: Առաջնահերթ խնդիր է հասարակական գիտակցության ձևավորումը, ինչպես նաև էկոկրթության և կայուն զբոսաշրջության այլ ասպեկտների վերաբերյալ գիտելիքների ապահովումը:
Հարցազրույցը վարեց` պ․գ․թ․, դոցենտ Մարինե Գևորգյանը