1990-ական թթ․ ՀՀ-ում իրագործված ագրարային վերափոխումների հանրագումարները.պ․գ․թ․, դոցենտ Մարինե Գևորգյան
Հայաստանի տնտեսության մեջ խոր, արմատական փոփոխությունները սկսվեցին դեռևս 1991 թ.:
1991 թ. վերափոխումների իրականացման առաջին փուլին բնորոշ թերություններն էին.
- Տարբերակված մոտեցման բացակայությունը: 1970-1980-ական թթ. դեռևս հաղթահարված չէր շրջանների, գյուղերի զարգացման անհամամասնությունը: Գյուղատնտեսության զարգացման առանձնահատկություններն իրենց կնիքն էին դրել ինչպես գյուղական բնակչության կառուցվածքի, այնպես էլ գյուղատնտեսական զբաղմունքների համակարգի վրա: Հողային ֆոնդի բաշխման, հողահանդակների մասնատվածության, մեկ շնչին բաժին ընկնող գյուղատնտեսական նշանկության հողերի տարբերությունները նույնպես կարևոր նշանակություն ունեին և պետք է հաշվի առնվեին վերափոխումների իրականացման ընթացքում:
- Պետության դերի և հիմնական գործառույթների հստակեցման բացակայությունը: Գյուղատնտեսությունում իրականացված վերափոխումները նախորդեցին տնտեսության այլ ճյուղերի փոփոխություններին, ինչը, բնականաբար, առաջացրեց բազմաթիվ բարդություններ` կապված գյուղմթերքների իրացման, գյուղատնտեսական աշխատանքների ամբողջական ցիկլի կազմակերպման հետ:
- Վերափոխումների հանդեպ գյուղացիների վերաբերմունքը դեռևս ձևավորված չէր: Բանն այն է, որ գյուղում սոցիալ-մասնագիտական և սեռատարիքային տարբեր խմբերը չէին կարող նույնանման մոտեցում ունենալ վերափոխումների հանդեպ, քանի որ տարբեր էին տնտեսական շահերը, գյուղատնտեսության, կոլեկտիվ և պետական տնտեսությունների հանդեպ ձևավորված վերաբերմունքը:
Հայաստանի իշխանությունները 1990-ական թթ. ոչ միայն քայլեր չէին ձեռնարկում արտասահմանյան առանձին ընկերությունների ու ֆիրմաների հետ համատեղ արտադրություն կազմակերպելու ուղղությամբ, այլ նաև խոչընդոտում էին նման նախաձեռնությունները: Իսկ հնարավորություններ, հատկապես 1988թ. դեկտեմբերյան երկրաշարժից հետո, մենք շատ ունեինք, բայց անխոհեմաբար չօգտվեցինք:
Գյուղատնտեսության ոլորտում վերափոխումների արդյունավետության գնահատման առումով հարկ է նշել, որ այս ոլորտում, ինչ խոսք, եղել են բավականաչափ դրական քայլեր, որոնք, սակայն, զուրկ լինելով ամբողջական և համակարգված մոտեցումներից, կրել են անավարտ, թերի, որոշ դեպքերում` ուշացած, չփոխկապակցված բնույթ:
Ագրարային վերափոխումների արդյունքների գնահատումը բավական բարդ գործընթաց է: Դժվար է տալ միատեսակ դրական կամ բացասական գնահատական: Այս առումով դրական է, որ ագրարային վերափոխումներ իրականացնող երկրների համար Համաշխարհային բանկը մշակել է գնահատման հատուկ մեթոդ: Չնայած այդ մեթոդը ևս խիստ պայմանական է` նկատի ունենալով ագրարային վերափոխում իրականացնող երկրի տեղական առանձնահատկությունները, սակայն ընդհանուր առմամբ դրա կիրառումը թույլ է տալիս տեսնել իրականացված վերափոխումների ընդհանուր պատ-կերը:
Համաձայն Համաշխարհային բանկի այդ մեթոդի, վերափոխումների արդյունքները գնահատվում են 1-10 սանդղակով և այդ գնահատումն իրականացնելիս հաշվի են առնվում մի շարք ոլորտներ, ինչպիսիք են`
ա. շուկայի ազատականացումը,
բ. հողային ռեֆորմը,
գ. սեփականաշնորհումը,
դ. գյուղացիական տնտեսություններին տրվող վարկերը,
ե. ենթակառուցվածքները:
Ստորև ներկայացնում ենք ՀՀ-ում իրականացված ագրարային վերափոխումների գնահատականը ըստ Համաշխարհային բանկի մեթոդի (1997 թ. դրությամբ) (աղյուսակ 1):
Աղյուսակ 1.
ՀՀ-ում իրականացված ագրարային վերափոխումների գնահատականը ըստ Համաշխարհային բանկի գնահատման (1997 թ. դրությամբ)
Շուկայի ազատականացում |
Հողային ռեֆորմ |
Սեփականա- շնորհում |
Գյուղացիական տնտեսություններին տրվող վարկեր
|
Ենթակառուցվածքներ |
Միջին միավոր |
7 |
8 |
7 |
6 |
7 |
7,0 |
Սանդղակային գնահատման համակարգում միավորներն ունեն իրենց բացատրությունը:
Այսպես, 7-8 միավոր տրվում է այն դեպքում, երբ առկա են ազատ շուկաները, կա բավականաչափ ազատ առևտրային քաղաքականություն, բայց դեռևս ներքին շուկան լիովին զարգացած չէ: Բացի այդ, այդ միավորը տրվում է նաև այն դեպքում, երբ հողը սեփականաշնորհված է, սակայն պատրաստ չեն բոլոր գրանցումային փաստաթղթերը, հողի շուկան ձևավորված չէ, սեփականաշնորհումն իրականացված է գյուղատնտեսության գրեթե բոլոր ճյուղերում, առաջացել են նաև գյուղատնտեսության վարկավորման կազմակերպություններ և այլն:
Ըստ վերոհիշյալ սանդղակի ագրարային վերափոխումները բաղկացած են հինգ հիմնական մասերից և այդ բոլոր մասերում իրականացված միջոցառումների շնորհիվ է ամբողջանում և տրվում ագրարային վերափոխումների գնահատականը: Ինչպես տեսնում ենք ներկայացված տվյալներից, ՀՀ-ն իրականացրած ագրարային վերակառուցումների արդյունքների գնահատման հիման վրա ստացել է 7 միավոր, այսինքն մեր երկրում առկա են բոլոր դրական չափորոշիչները: Այլ խոսքով, ՀՀ-ում առկա են ազատ շուկաները, ձևավորվել է բավականաչափ ազատ առևտրային քաղաքականություն, բայց դեռևս ներքին շուկան լիովին զարգացած չէ: Բացի այդ, հողը սեփականաշնորհված է, սակայն պատրաստ չեն բոլոր գրանցումային փաստաթղթերը, հողի շուկան ձևավորված չէ ամբողջությամբ, սեփականաշնորհումն իրականացված է գյուղատնտեսության գրեթե բոլոր ճյուղերում, առաջացել են նաև գյուղատնտեսության վարկավորման կազմակերպությունները: Հարկ է նշել, որ Համաշխարհային բանկի առաջարկած մեթոդով հայկական վերափոխումների այս գնահատականը որքան էլ առաջին հայացքից դրական լինի, սակայն ընդգծենք, որ բերված թվերը հիմնականում ագրարային վերափոխումների քանակական, այլ ոչ թե որակական ցուցանիշներ են: Այլ խոսքերով ասած` ագրարային վերափոխումների արմատական բնույթը ամենևին էլ չի նշանակում ազգային տնտեսության ագրարային հատվածի վերականգնում կամ առավել ևս` որակական աճ: Դրանում մենք համոզվելու ժամանակ ունեցել ենք:
Այսօր արդեն վստահաբար կարող ենք արձանագրել, որ Հայաստանի Հանրապետությունը արդեն դուրս է եկել ագրարային վերափոխումների և արմատական փոփոխությունների առաջին փուլին հատուկ անկման շրջանից և արդեն ապահովում է տնտեսական աճ: Չնայած դրան՝ մինչ օրս առկա են սոցիալ-տնտեսական չլուծված խնդիրներ, սակայն ագրարային ոլորտում Հայաստանի զարգացումը բավական առաջ է իր հարևաններից:
Այսուհանդերձ, օրախնդիր են տնտեսության հեռանկարային զարգացման համար կայուն հիմքերի ապահովման և միջազգային համագործակ֊ցության խորացման հարցերը: Նշենք նաև, որ ինչպես մյուս հետխորհրդային հանրապետություններում, այնպես էլ ՀՀ-ում ագրարային ոլորտի ծառայությունների ու ենթակառուց֊վածքների զարգացումը դեռևս անմիջական պետական աջակցություն է պահանջում, մասնավորապես ոռոգման համակարգերի զարգացման, սննդի անվտանգության, բույսերի պաշտպանության, գյուղական վարկավորման և գյուղմթերքների իրացման խնդիրների լուծման գործում։
<<Զորավար Սեպուհ>> պատմաքաղաքական վերլուծական կենտրոնի փորձագետ Մարինե Գևորգյան