Հարյուր հազարավոր ուկրաինուհիներ կմտցվեն զինվորական հաշվառման մեջ
Ուկրաինայում պաշտպանության նախարարության ուժի մեջ մտած նոր հրամանի համաձայն՝ հարյուր հազարավոր կանայք պետք է զինվորական հաշվառման վերցվեն։ Այս մասին տեղեկացվում է «АрмияInform» տեղեկատվական գործակալության կայքում։
«Ուժի մեջ է մտել պաշտպանության նախարարության 11.10.2021թ. հրամանը, որով հաստատվել է այն ճյուղերի եւ մասնագիտությունների ցանկը, որոնցում աշխատող կանայք պետք է վերցվեն զինվորական հաշվառման եւ գտնվեն այդ հաշվառման մեջ... Ցուցակը պարունակում է 35 մասնագիտական ուղղություն, որոնցից յուրաքանչյուրը, ըստ էության, տնտեսական գործունեության տասնյակ առանձին մասնագիտություններ է ներկայացնում... Խոսքը հարյուր հազարավոր ուկրաինացի կանանց մասին է»,- ասվում է հրապարակման մեջ։
Մասնագիտական ուղղությունների ցանկում տեղ է գտել մասնագիտությունների ընդարձակ ցուցակ։ Հանրային սննդից եւ արդարադատությունից մինչեւ հրատարակչություններ ու տպագրություն։
Զինվորական հաշվառումից խուսափելու դեպքում նախատեսված է վարչական պատասխանատվություն։ Մասնավորապես, գործատուին, որը չի վերահսկի աշխատակցուհիների հաշվառման մասին փաստաթղթերի առկայությունը, կտուգանեն 5,1 հազարից մինչեւ 8,5 հազար գրիվնա (187-312 դոլար)։