Թուրքիան իրատեսական չի համարում Ղրիմի եւ Դոնբասի վերաբերյալ Ռուսաստանի պահանջները. Իբրահիմ Քալըն
Նախագահ Թայիփ Էրդողանի պաշտոնական ներկայացուցիչ Իբրահիմ Քալընը Ղրիմի վերամիավորման եւ Դոնեցկի ու Լուգանսկի ժողովրդական հանրապետությունների անկախության վերաբերյալ Ռուսաստանի պահանջներն իրատեսական չի համարում, տեղեկացրել է CNN-ը։
«Բանակցությունների ամենաբարդ թեմաներն, իհարկե, վերաբերում են Ուկրաինայի տարածքային ամբողջականությանը, որը պետք է պաշտպանության տակ լինի։ Ուկրաինական կողմը չի կարող փոխզիջման գնալ Ղրիմի եւ Դոնբասի հարցում։ Դրանք խիստ առավելապաշտական պահանջներ են, որոնք իրատեսական չեն։ Դա ուղղակիորեն վերաբերում է Ուկրաինայի տարածքային ամբողջականությանն ու ինքնիշխանությանը»,- ասել է Քալընը։
Ընդ որում՝ Էրդողանի ներկայացուցիչը հայտարարել է, որ Մոսկվան ՆԱՏՕ-ին չի վստահում, եւ միայն Թուրքիան է դաշինքի անդամներից, որը չեզոքություն է պահպանում, ինչը հնարավոր է դարձնում երկխոսությունն այդ երկրում։ Քալընի խոսքով՝ Ռուսաստանի նախագահ Վլադիմիր Պուտինը լսում է Էրդողանին։
