Փենսիլվանիայի դատարանը բավարարել է փոստային քվեների հաշվարկի վերաբերյալ Թրամփի հայցը
ԱՄՆ Փենսիլվանիա նահանգի վերաքննիչ դատարանը բավարարել է ԱՄՆ գործող նախագահ Դոնալդ Թրամփի շտաբի հայցը, որը վիճարկում է պետության ղեկավարի ընտրության ժամանակ փոստային ձայների հաշվարկի օրինականությունը: Այս մասին գրում է Philadelphia Inquirer պարբերականը, փոխանցում է Tert.am-ը:
Վեճը վերաբերում էր այն ընտրողների քվեաթերթիկներին, որոնք չեն հաստատել իրենց ինքնությունը: Փենսիլվանիայում գործող օրենքի համաձայն՝ ընտրողները կարող էին հաստատել իրենց ինքնությունը ընտրություններից հետո 6 օրվա ընթացքում, այսինքն ՝ մինչ նոյեմբերի 9-ը, սակայն նահանգի պետքարտուղար Քեթի Բուքվարը երկարաձգել է այս ժամկետը մինչև նոյեմբերի 12-ը:
«Դատարանը վճիռ է կայացրել, որ պատասխանող Քեթի Բուքվարը, որպես պետքարտուղար, լիազորություն չուներ ուղղորդելու տեղական ընտրական հանձնաժողովներին՝ որոշ ընտրողների նույնականացման վերջնաժամկետը փոխելու համար», - վճռել է հանրապետական դատավոր Մերի Հաննա Լիվիտը:
Պարբերականը Թրամփի դատական հաղթանակը «աննշան» է անվանում ՝ մատնանշելով, որ խոսքը փոքր թվով քվեաթերթիկների մասին է: Ըստ թերթի ՝ այս ձայները չեն ներառվել պաշտոնական հաշվարկի մեջ, համաձայն որի ՝ Բայդենը 54 000 ձայնով առաջ է անցել Թրամփից:
Ըստ ամերիկյան ԶԼՄ–ների՝ Բայդենը հաղթանակ է տարել Փենսիլվանիա նահանգում, ինչն ապահովում է ընտրիչների 20 ձայն: Այդպիսով, նա ստանում է 284 ձայն (ընտրվելու համար անհրաժեշտ է 270 ընտրիչի ձայն), մինչդեռ գործող նախագահ Դոնալդ Թրամփը ստացել է 213-ը:
ԱՄՆ գործող նախագահ Դոնալդ Թրամփը, սակայն չի ընդունում պարտությունը և հայտարարել է, որ ընտրությունները դեռ չեն ավարտվել։ Ավելին, նա նաև հայտարարել է, որ ձայների մեծ առավելությամբ հաղթանակ է տարել երկրի ղեկավարի ընտրություններում:
