ԱՀԿ-ն հայտարարել է, որ 31,3 մլրդ դոլար է անհրաժեշտ կորոնավիրուսի դեմ պատվաստանյութերի և դեղերի մշակման համար
<p>Առողջապահության համաշխարհային կազմակերպությանը 31,3 մլրդ դոլար է անհրաժեշտ մինչև 2021 թվականի ավարտը COVID-19-ի թեստերի, պատվաստանյութերի և դեղերի մշակման և տարածման ծրագրերի զարգացման համար: Այդ մասին ասված է ԱՀԿ-ի կողմից գործարկված ACT-Accelerator նոր կորոնավիրուսի դեմ պայքարի միջոցների մշակումն արագացնելու միջազգային գործընկերության ծրագրի հայտարարության մեջ, գրում է <a href="https://www.nytimes.com/reuters/2020/06/26/us/26reuters-health-coronavirus-who.html" rel="nofollow" target="_blank">New York Time</a>s-ը։</p> <p>ACT-Accelerator-ը ապրիլի 24-ին ստեղծվել է ԱՀԿ-ի կողմից՝ Եվրամիության, Ֆրանսիայի, Բիլ և Մելինդա Գեյթսերի հիմնադրամի հետ համատեղ: Հունիսի վերջի տվյալներով՝ ծրագիրն արդեն ստացել է 3,4 մլրդ դոլարի չափով ֆինանսական օգնություն:</p> <p>«Այսօր ներկայացված պլանների համաձայն՝ ախտորոշման, թերապևտիկ միջոցների և պատվաստանյութերի ֆինանսավորման համար անհրաժեշտ է 31,3 մլրդ դոլար, որոնցից այսօրվա դրությամբ առկա է 3,4 մլրդ դոլարը։ Այսպիսով, անհրաժեշտ է ևս 27,9 մլրդ դոլար՝ ներառյալ 13,7 մլրդ դոլար՝ հրատապ կարիքները բավարարելու համար»,- ասված է հայտարարության մեջ:</p> <p>Ինչպես նշվում է, ԱՀԿ-ի ծրագիրը հույս ունի այդ գումարով արագացնել պատվաստանյութի մշակումը, ավելացնել մատակարարումները և 2021 թվականի կեսերին 500 մլն թեստեր բաշխել և ձեռք բերել երկու միլիարդ չափաբաժին պատվաստանյութեր, որոնցից մեկ միլիարդը՝ 2021 թվականի վերջին:</p> <p> </p> <pre> <em>Աղբյուրը` Tert.am</em></pre>
