Փարիզում թալանել են Նիկոլայ Սարկիսովի բնակարանը
Անհայտ անձինք Փարիզում թալանել են ռուսաստանցի գործարար Նիկոլայ Սարկիսովի բնակարանը: Այս մասին երեքշաբթի օրը հաղորդել է France-Presse գործակալությունը՝ վկայակոչելով իրավապահ մարմիններում աղբյուրներին:
Նշվում է, որ բնակարանը Ֆրանսիայի մայրաքաղաքի 16-րդ թաղամասի Ֆոշ փողոցում գտնվող շենքում է: Գործակալության տվյալներով՝ դեպքը տեղի է ունեցել անցած շաբաթվա վերջին: Անհայտ անձինք գողացել են ժամացույցներ, թանկարժեք զարդեր, մորթե եւ կաշվե իրեր: Նախնական գնահատականներով՝ վնասի չափը կազմում է առնվազն 500 000 եվրո, հաղորդում է ՏԱՍՍ-ը:
Այս գումարը դեռ կարող է ճշգրտվել սեփականատիրոջ կողմից, ով ներկայումս գտնվում է Ֆրանսիայի հարավում: Փաստի առթիվ Փարիզի դատախազությունը հետաքննություն է սկսել:
Նիկոլայ Սարկիսովը «ՌԵՍՈ-Գարանտիա» ապահովագրական ընկերության հիմնադիրներից է եւ զբաղեցնում է գլխավոր տնօրենի տեղակալի պաշտոնը։