Հայաստանը նպաստավոր գործարար միջավայր ունի. դեսպան
Դիվերսիֆիկացիան այն է, ինչ բոլոր ոլորտներում անհրաժեշտ է մի երկրի, որը ցանկանում է ապահովել իր անկախությունը՝ տնտեսության, պաշտպանության ու քաղաքական ոլորտներում: Այս մասին Հանրային հեռուստատեսությանը տված հարցազրույցում նշեց Հայաստանում Ֆրանսիայի արտակարգ եւ լիազոր դեսպան Օլիվիե Դըկոտինյին՝ անդրադառնալով հարցին, թե որքանո՞վ է հնարավոր Հայաստանի տնտեսության դիվերսիֆիկացիան՝ հաշվի առնելով, որ հայկական ապրանքները հիմնականում արտահանվում եմ Ռուսաստան, արդյոք այդ ապրանքները հնարավոր կլինի արտահանել Եվրոպա:
«Ֆրանսերեն արտահայտություն կա՝ պետք չէ բոլոր ձվերը դնել մի զամբյուղի մեջ: Ես կարծում եմ, որ սա այսօր ՀՀ իշխանությունների մտահոգությունն է: Մենք՝ ֆրանսիացիներս, պատրաստ ենք աջակցել Հայաստանին այս ճանապարհին: Կոնկրետ այսօր Հայաստանի ջրի ամենախոշոր մատակարարը ֆրանսիական ընկերությունն է՝ «Վեոլիա ջրի» հայկական մասնաճյուղը: Հայաստանում կուտակային կենսաթոշակի ամենախոշոր հիմնադրամը ֆրանսիական «Ամունդի ակբա» ընկերությունն է:
Այսպիսով մենք սկսել ենք աջակցության գործընթացը, ինչը նշանակում է, որ արդեն կարող ենք ինչ-որ բան անել: Այո, կարող ենք ավելին անել: Ի՞նչ է դա ենթադրում: Դա ենթադրում է, որ Հայաստանը նպաստավոր գործարար միջավայր ունի, դա ենթադրում է պայքար մենաշնորհների, կոռուպցիայի դեմ, նպաստավոր պայմաններ օտարերկրյա ձեռնարկությունների համար, որոնք տեղակայվում են Հայաստանում:
Հիշենք, թե ինչպես Օրանժը լքեց Հայաստանը անբարենպաստ պայմանների հետեւանքով, ինչը հիասթափեցրեց բազմաթիվ ֆրանսիկան ձեռնարկությունների, որոնք նպատակ ունեին տեղակայվել Հայաստանում: Հայաստանը պետք է ջանքեր գործադրի բարելավելու գործարար միջավայրը, իսկ եվրոպացիների կողմից կա կամք այդ գործում ներգրավվելու: Ֆրանսիական կողմից այդ կամքն ակնհայտ է»,-ասաց նա:
Հարցին՝ որքանո՞վ են եվրաինտեգրմանը խոչընդոտում Հայաստանի հարաբերությունները ՌԴ-ի հետ՝ ԵԱՏՄ-ի, ՀԱՊԿ-ի շրջանակներում, Ֆրանսիայի դեսպանը պատասխանեց. «Այսօր չի կարելի Ռուսաստանն ասոցացնել Եվրպայի հետ այն պահին, երբ Ռուսաստանը հիմնական սպառնալիքն է Եվրոպայի անվտանգության համար: Դուք որպես Հայաստան, գտնվում եք տարածաշրջանային մի միջավայրում, երբ Հայաստանը շրջապատված է այնպիսի տարծաշրջանային գերտերություններով, ինչպիսիք են Ռուսաստանը, Թուրքիան եւ Իրանը: Դուք պետք է կարողանաք գործել այդ տրածաշրջանային միջավայրում՝ միաժամանակ զարգացնել ձեր կապերն ավելի հեռու գտնվող երկրների հետ՝ ԵՄ երկրներ, Ֆրանսիա, Հնդկաստան: Ես չեմ կարծում, որ հիմնարար հակասություն կա, չկա մեկ հիմնական ընտրություն անելու անհրաժեշտություն, այլ կա բազմաթիվ ընտրություններ անելու հնարավորություն որոշակի հարցերի շուրջ՝ ըստ ձեր շահերի:
Մենք այստեղ ենք, որ պրագմատիկ ձեւով արձագանքենք ձեր կարիքներին, եւ մենք արդեն դա ցույց ենք տվել ռազմական ոլորտում: Դա չի խանգարել Հայաստանին չլքել ՀԱՊԿ-ը:
