Իրանի եւ Սաուդյան Արաբիայի ներկայացուցիչները Ամանում անվտանգության հարցերով հանդիպում են անցկացրել
Իրանի եւ Սաուդյան Արաբիայի ներկայացուցիչները Ամանում անվտանգության հարցերով հանդիպում են անցկացրել, որպեսզի քննարկեն տարբեր հարցեր, այդ թվում՝ Իրանի միջուկային ծրագիրը, հայտնում է Mehr-ը՝ հղում անելով Հորդանանի պաշտոնական Petra լրատվական գործակալությանը։
Հանդիպումը կազմակերպել է Ամանում Անվտանգության հետազոտությունների արաբական ինստիտուտը։
Հանդիպման ընթացքում ուշադրությունը կենտրոնացվել է «հրթիռային սպառնալիքի նվազեցման եւ երկու կողմերի միջեւ վստահության ամրապնդման, հատկապես Իրանի միջուկային ծրագրի շուրջ միջոցառումների վրա»:
Իրանական եւ սաուդյան կողմերը, մասնավորապես, քննարկել են միջուկային վառելիքի եւ այլ ոլորտներում համագործակցության հարցեր։
«Հանդիպման ընթացքում գերակշռել է փոխադարձ հարգանքը, ինչը ցույց է տալիս հարաբերությունները զարգացնելու եւ տարածաշրջանային կայունությունը ամրապնդելու երկու կողմերի պատրաստակամությունը»,- ասել է ինստիտուտի տնօրեն Այման Խալիլը։ Նա հավելել է, որ առաջիկայում երկու կողմերի միջեւ լրացուցիչ հանդիպումներ կանցկացվեն՝ հանդիպման ընթացքում արված առաջարկությունները կյանքի կոչելու համար։