Ադրբեջանական լրատվամիջոցը լատվիացի պատգամավորի անունից կեղծիք է տարածել. պատգամավորը հակադարձել է
ԵԱՀԿ խորհրդարանական վեհաժողովում Լատվիայի պատվիրակության ղեկավար Ինեսա Իկստենան ադրբեջանական Haqqin.az լրատվամիջոցին մեղադրել է իր անունից ապատեղեկատվություն տարածելու մեջ: «Արմենպրես»-ի փոխանցմամբ` լրատվամիջոցը գրել է, թե իբր լատվիացի պատգամավորը Լեռնային Ղարաբաղի հակամարտության վերաբերյալ դիրքորոշում է հայտնել` հօգուտ Ադրբեջանի:
«Լրագրող Վլադիմիր Ռեշետովի կողմից ԶԼՄ-ներում կեղծ տեղեկատվության տարածման կապակցությամբ կցանկանայի ուշադրություն դարձնել այն հանգամանքի վրա, որ գրվածը չի համապատասխանում իրականությանը, և իմ անունն ու լուսանկարը տարածվել են առանց իմ համաձայնության»,- գրել է Իկստենան:
Արցախի դեմ սեպտեմբերի 27-ից Ադրբեջանի` Թուրքիայի և վարձկան-ահաբեկիչների աջակցությամբ սանձազերծած ռազմական գործողությունների ընթացքում երեք անգամ` հոկտեմբերի 10-ին Ռուսաստանի, հոկտեմբերի 18-ին Ֆրանսիայի, հոկտեմբերի 26-ին ԱՄՆ-ի միջնորդությամբ հայտարարվել է հրադադարի մասին, սակայն Ադրբեջանը ուժի մեջ մտնելուց րոպեներ անց խախտել է դրանք, ձեռնարկել դիվերսիոն գրոհներ, հրետակոծել առաջնագիծն ու խաղաղ բնակավայրերը։
